في الفترة الأخيرة ظهر جروب على الفيس بوك بأسم ” فلوس مزوره”  وموجود عليه 65 ألف عضو، وفي الجروب ده  الناس بتبيع فلوس مزورة بدقة عالية جدا” ، وكمان بتبيعها  بقيمة أقل من قيمتها  ب50 في المية.

والأخطر من كده كمان أن في ناس كتيرة بتسأل علي شغل مزور وبتدور عليه، ومش بس كده ديه بتشتري منه بكميات كبيرة جدا.

و دة للأسف ده معناه، ان معظمنا دلوقتي ممكن يكون في جيبه فلوس مزورة  وهو مايعرفش.

فعشان كده  قلنا لازم نعمل البوست ده عشان ننبه علي اننا لازم نراجع اي فلوس بتاخدها من أي مكان عشان تقدر تكتشف  إذا كانت مزورة ولا لأ.

 بس أزاي نقدر نتعرف علي الفلوس المزورة ديه؟

• أول حاجة من ملمس الرقم اللي بيوضح قيمة الفلوس وده دايما بيكون ملمسه خشن ، لكن لما بتتزور بيكون صعب تقليد الملمس ده ، فلما تجي تحسه بايدك وتلاقيه ناعم ، فده علي طول بتعرف منها أن الفلوس ديه  مزوره.

• ودايما بيكون الشريط الفضي الموجود في الفلوس فضي لامع ، بس لما بيتقلد بيكون لونه مايل أكتر للأسود .

• وكمان ممكن تكتشف التزوير من الصور الموجوده  في ضهر الفلوس واللي بتظهر كويس جدا لو عرضت الفلوس للضوء أو أشعة الشمس ، ولكن لو  الفلوس مزورة بتبان الصورة من غير ما تعرضها للشمس أصلا.

• وآخر حاجة أنك تستعمل المياة عشان تعرف الفلوس مزورة ولا لأ ، فلو بليت صوابعك وفركت  بيها الفلوس ، فلو اتمسحت الرسومات فبتكون الفلوس مزورة لأنها لو حقيقية بتفضل الرسومات زي ماهيه.

بس الحقيقة أن من الأفضل في معظم تعاملاتنا دلوقتي ان احنا  نستخدم المحافظ الإلكترونية، عشان نقلل تعاملاتنا بالفلوس ،بس لو كنت مضطر أنك تتعامل بالفلوس فلازم تاخد بالك من الحاجات اللي احنا قولنا عليها عشان ماتقعش  فريسة للنوع ده من أنواع النصب .