بعد ما انتشرت علي السوشيال ميديا وبعض المجلات أخبار عن واحدة اسمها فريدة محمد رمضان، بتقول انها “عابرة جنسياً” اتولدت وعاشت كذكر لحد ما اتعينت كمدرس في وزارة التربية والتعليم ومن هنا بدأت رحلة العبور من كونها ذكر لأنثي، وعلشان التغيب الكتير بسبب عمليات العبور الجنسي اللي كانت بتخضعلها، اتفصلت من وظيفتها ومعادش عندها شغل علشان تصرف علي نفسها.

مين هي فريدة رمضان؟

فريدة هي امرأة عابرة جنسياً في الخمسين من العمر. قضت عشرات السنين ما بين جلسات الدكاترة في إختبارات نفسية ومسحات علي المخ وتحاليل دم علشان تاخد التقارير اللي تثبت إنها امرأة عابرة جنسياً وتعمل عملية العبور الجنسي اللي محتاجاها.

فريدة بتقول انها كان عندها حياة كاملة اضطرت تتخلي عنها علشان مقدرتش تعيش في جسم وموقع إجتماعي مش بتوعها. اضطرت تسيب البلد اللي كانت عايشة فيها وتروح بلد جديد مفهوش ناس كتير تعرف ماضيها كان شكله ايه.

تقدر تقري قصة أم ألاء بالكامل علي Egypt Independent.

كانت مدرسة قبل ما أهلها يتخلوا عنها وتتطرد من شغلها علشان تعقيدات ليها علاقة بكونها عابرة جنسياً وحالياً بتدي دروس لأولاد جيرانها علشان تقدر تعيش.

تعليق وزير التعليم علي قضية فريدة

بعد انتشار قصة فريدة علي بعض المجلات وسوشيال ميديا مختلفة، اتكلم معاها عمرو أديب في برنامج الحكاية واتعرض لحكايتها وده اللي دفع وزير التعليم انه يتحقق من قضية فريدة ويتواصل مع عمرو أديب.

في المكالمة دي وضح الوزير اهمية اننا نتقبل العابرين جنسياَ في المجتمع “بالرغم أنه أشار إليهم بلفظة المتحولين” وطالب بتدخل الأطباء النفسيين ورجال الدين والمعنيين لدعوة المجتمع لدعم الحالات دي ووقف التنمر ضدهم.

اخبار كتير بنسمعها من زمان عن ناس بيعملوا عمليات العبور الجنسي. وفي ألفاظ تاني زي تصحيح الجنس. أيه معني الألفاظ دي؟

الجنس والجندر

لازم الأول نفرق ما بين مفهومي الجنس والجندر لأن اللغة العربية للأسف مفيهاش ألفاظ محددة تقدر تعبر عن معني الجنس والجندر وعلشان كدا بيكون من الصعب علي المجتمعات العربية تفهم الفرق، في حين أن معظم لغات العالم عندها الألفاظ اللي تقدر توصل لمتحدثيها المعني ده.

طبقاً لمنظمة الصحة العالمية، الجنس هو الهوية التشريحية للشخص بناءاً علي شكل الأعضاء التناسلية واللي بتحدد الحيز الاجتماعي اللي بينتمي اليه من حيث الذكور أو الإناث. في حين أن الجندر هو الهوية النفسية الداخلية للفرد من حيث كونه ذكر أو أنثي عقلياً ونفسياً وعايز/ة يعيشوا الدور الاجتماعي كذكر أو كأنثي، بغض النظر عن شكل أعضائهم التناسلية.

يعني جنس الفرد هو شكل أعضاءه التناسلية في حين هوية الفرد الجندرية هي احساسه الداخلي بنوعه كذكر أو أنثي.

في لفظتين تانين لازم نتكلم عنهم. هما الترانزجندر Transgender والترانزسيكشوال Transsexual. الأول بيكون الشخص اللي هويته الجندرية غير متوافقة مع شكل جسمه وشكل اعضاءه التناسلية اللي اتولد بيهم. في حين اللفظة التانية بتعبر عن شخص بيكون  غالباً مر بعملية عبور جنسي عملية جراحية او علاج هرموني او كلاهما معاً sex reassignment.

يعني ايه متحول جنسي؟

دي اللفظة الدارجة الي بتعبر عن العابرين جنسياً في مصر، ولكن مجتمع العابرين بيعتبرها مهينة وبيفضلوا الفاظ تانية زي العابرين والعابرات جنسياً.

يعني عبور جنسي؟

العابرين جنسياً بيكونوا أشخاص مولودين في جنس معين ومعندهمش أي مشاكل جسدية أو تشريحية أو هرمونية، لكن هويتهم النفسية “الجندرية” بتكون مش متوافقة مع الجنس اللي اتولدوا فيه وده طبياً بيتمسي الاضطراب الجنسي/ الجندري. والأطباء بيقولوا أنه اضطراب بيولوجي مش عقلي وأن الأشخاص اللي بيحسوا بيه بيكونوا اشخاص قادرين علي الشعور بجنسهم الحقيقي من الداخل.

والعبور الجنسي هو هو العملية اللي بياخد فيها الشخص هويته الجندرية، سواء يبدأ يلبس ملابس الجندر المرغوب او يتنادي بضمائر الجندر المرغوب. وممكن العملية تتضمن علاج نفسي وهرموني وجراحي بيتم فيها منح الفرد الشكل الخارجي للجسم اللي بيكون مقبول اجتماعياً من حيث الهوية الجنسية للجنس الجديد، وممكن كمان منحه شكل الأعضاء التناسلية التشريحي للجنس اللي هو عايز يعيش فيه.

بس العلاج الهرموني او الجراحي او حتي التعرض للطب النفسي مش شرط علشان الشخص يعتبر ترانسجندر او عابر جنسي. طالما الشخص حدد نفسه او نفسها كعابر جنسي وطلب من المجتمع يحطه في الجندر المعين ده، يبقي خلاص هو ترانسجندر/ عابر جنسي، والمجتمع المفروض يتقبله بكيانه الجندري الجديد.

طبقاً للطب النفسي: الاشخاص المصابين بالاضطراب الجنسي بيعانوا من أمراض نفسية كتير زي القلق والتوتر والإكتئاب وحالات تانية من العزلة الاجتماعية وكراهية الذاتـ، لأنهم بيحسوا أنهم مسجونين في جسم مش بينتمي لجنسهم الحقيقي وهويتهم الجندرية. وفي معظم الحالات اللي مش بيحصل فيها تصحيح للهوية الجندرية بالطريقة اللي الفرد حابب انها تحصل، سواء بمجرد تغير الملابس والادوار والضمائر او  تدخل طبي لتغير جنس الشخص ومساعدته نفسياً علي الانتقال للجنس اللي عايزه، الشخص بينتحر.. للمصدر اقري هنا.

في المقال ده هنركز علي العابرين جنسياً اللي بيمروا بالعبور الطبي والجراحي. 

مراحل العبور الجنسي طبياً وجراحياً

عملية العبور الجنسي بتستغرق فترة طويلة. ومنظمة الصحة العالمية حددت معايير محددة لإتمام العملية الجراحية منها المرور بتحليل نفسي دقيق للتأكد من استعدادية الفرد للخضوع لعملية العبور الجنسي/ الجندري. التحليل النفسي ده ممكن يستغرق سنة أو أكتر، وفيه بيتأكد الطبيب النفسي أن الهوية الجندرية للفرد متوافقة مع الجنس الأخر مش الجنس اللي مولود فيه.

بعد ما الفرد بيعدي بفترة التحليل النفسي بيدخل في فترة تجريبية بيعيش فيها الظروف الاجتماعية والشكل الاجتماعي للجنس الأخر. يعني الفرد بيلبس لبس الجنس اللي عايز يعيش فيه ويبدأ يعيش طبقاً للظروف الاجتماعية للجنس ده. وبعد كدا بيدخل مرحلة العلاج بالهرمونات وفي النهاية بتكون العملية الجراحية. للمصدر اقري هنا.

عملية تصحيح الجنس

لما بيحصل اختلاط تشريحي في الأعضاء التناسلية للفرد بحيث بيكون من الصعب تحديد جنسه عند الولادة بيكون محتاج لعملية تصحيح جنسي. بعض الأفراد بيتولدوا بأعضاء تناسلية ذكورية وأنثوية في نفس الوقت والبعض بيتولد بأعضاء تناسلية داخلية ومش بتظهر من الخارج ودول غالباً بيتم تحديد جنسهم غلط عند الولادة.

حالات تداخل الجنسي التشريحي بتكون كتير وأحيانا كتير معقدة وفي بعضها مبيكونش في تعريف واضح للجنس التشريحي للفرد وفي الحالات دي الطب بيمنح الحرية للفرد في اختيار جنسه طبقاً لهويته الجندرية “احساسه الداخلي بجنسه كذكر أو أنثي”.

عملية تصحيح الجنس مش بتختلف كتير عن عملية العبور الجنسي إلا أنها بتكون إلي حد ما أقل تعقيداً.

أمثلة علي أشخاص مروا بالعبور الجنسي

نور هشام سليم

نور هو راجل عابر للجنس. اتولد بهوية جنسية كأنثي وبعد كدا اتشخص باضطراب الهوية الجندرية في بداية المراهقة، في الوقت ده كان نور مدرك أن هويته الجندرية الداخلية مش متوافقة مع الجنس اللي اتولد بيه. وقرر انه هيعبر للجنس الحقيقي ليه وهيصلح الخطأ التشريحي اللي كان عايش بيه.

ظهر نور ووالده، هشام سليم، في مجموعة لقاءات تلفزيونية ومرات ظهر كل واحد فيهم لوحده واتكلموا عن عبور نور لجنسه الحقيقي. واللي لاقي بعد كده دعم من ناس كتير لظنهم خطأ ان حالة نور هي تصحيح جنس. وده اللي ظهر نور علشان يأكد أنه خطأ وأنه حالته هي عبور جنسي.

في الفيديو ده نور هشام سليم بيوضح للناس اللي فاكرينه مر بعملية تصحيح جنس، ان تجربته كانت عبور جنسي، وبيستنكر أن الدعم الكبير اللي متوجه لتجربته بيقابله عنف اجتماعي وكراهية لعابرين أخرين زي ملك الكاشف لأن الكاشف مرت بالتجربة في الإتجاه الأخر (اتولدت ذكر وعبرت للأنوثة). وملك الكاشف هي امرأة عابرة جنسياً وناشطة سياسية اتعرضت للاعتقال اكثر من مرة في قضايا سياسية.

وفي الفيديو ده بتظهر ملك الكاشف وهي بتحكي عن الصعوبات اللي بتواجهها كعابرة جنسياً في مجتمع غير قادر علي تقبلها كإنسانة.

ملك اتسجنت اكتر من مرة بسبب نشاطها السياسي والحقوقي وللأسف مرت بظروف صعبة جداً في السجن لأنها اتحطت في سجن الرجال رغم كونها امرأة عابرة جنسياً وده اللي عرضها لمخاطر واهانات كتير.

كيم بيتراس

كيم عي مطربة ألمانية عايشة في لوس أنجلوس وبتغني إنجلش. تم تشخيصها باضطراب الهوية الجندرية قبل ما تكمل 16 سنة. وأهلها قالوا أنها عرفت نفسها كبنت من وقت ما كان عندها سنتين ولما عرفوا أن دي مكانتش مجرد مرحلة بدأوا يتعاملوا معاها علي حسب هويتها الجندرية كأنثي.

في 2016 كانت كيم بيتراس اصغر عابرة جنسياً تخضع للعلاج الهرموني وتبدأ عملية العبور الجنسي.

لارفين كوكس

لارفين كوكس هي ممثلة ومنتجة مسلسلات امريكية. وكانت أول عابرة جنسياً تترشح لجايزة الايمي.

حنان الطويل

حنان الطويل من أشهر العابرات جنسياً في مصر. وهي ممثلة كوميدية اتشهرت جداً بأدوار زي ميس انشراح في فيلم الناظر وكوريا في فيلم 55 اسعاف.

الضغوط الاجتماعية ووصمة العار اللي اتعرضتلها حنان، كأمرأة عابرة جنسياً، خلال حياتها، اتسببتلها في اذي نفسي كبير جداً واللي مقدرتش تتعامل معاه بطريقة صحية واجبرها في النهاية انها تنتحر.

كارلا مسعود

امرأة عابرة جنسياً اتولدت في محافظة سوهاج واتعرضت للضرب والسجن والتحرش كتير جداً علي مدار حياتها من كل المحيطين بيها في المجتمع الصعيدي المحافظ اللي عاشت فيه.

اهلها عرضوها لاساءات كتير اتمثلت في الضرب والتهديد والسحل علشان تتراجع عن فكرة العبور الجنسي ووصل الأمر أنها مكانتش بتقدر تروح الجامعة غير في حضور أمن لحمايتها من تحرش زملاء الدراسة.

قدرت تهاجر لألمانيا علشان تعيش حياة أبسط وأهدي من حياتها في مصر وهناك كملت عبورها واتجوزت وعايشة حياة هادية وسعيدة.

عمليات تصحيح الجنس والعبور الجنسي في مصر ووصمة العار والإساءات اللي العابرين بيتعرضولها

لحد قبل 2014 كانت عمليات العبور والتصحيح بتتم بسلاسة وطبقاً للبروتوكول المنصوص عليه من منظمة الصحة العالمية.

اللجنة المسئولة عن العلاج والعمليات دي بتضم مجموعة من الأطباء من مختلف التخصصات بالإضافة إلي ممثل لدار الإفتاء. في 2014 حصل خلاف ما بين اعضاء اللجنة حولين قبول الحالات، الأطباء النفسيين كان ليهم رأي وبعض الأطباء من تخصصات تانية زي الجراحة كان ليهم رأي تاني، وممثل دار الإفتاء كان ليه رأي تالت خالص.

المهم في النهاية أن ممثل دار الإفتاء بيرفض حضور جلسات اللجنة وبالتالي عمل اللجنة متوقف من 2014 وكل الملفات الطبية للحالات اللي محتاجة تدخل طبي، متوقفة. علشان تعرف اسباب الخلاف وتوقف عمل اللجنة تقدر تقرا عنها من هنا.

في  النهاية في اسئلة لازم نسألها ليك يا عزيزي القارئ.

بغض النظر عن توجهاتك الفلسفية, هل أنت قادر علي تحمل عواقب دفع شخص للانتحار لمجرد انه مختلف؟

هل اختلاف انسان عنك هو سبب كافي لأنك تعرضه للوصمة والاساءة والألم اللي يدفعوه لمكان مظلم للدرجة دي؟هل الانسان حر ما لم يضر؟ 

بمناسبة شيكابالا، 5 حكايات مرعبة عن العنصرية ضد أصحاب البشرة الداكنة في مصر