كل سنة وأنتم طيبين بمناسبة الأحتفال بالمولد النبوي الشريف، وطبعا كل المصريين عندهم عادات وطقوس لازم يعملوها في اليوم ده، اللي اكيد من ضمنها أكل حلويات المولد. 

وديه طبعا تعتبر من أساسيات  اليوم ده، ومفيش بيت مصري ما بيجبش حلاوة المولد، وعروسة المولد والحصان لأولاده. 

وبيرجع تاريخ ظهورها إلى عصر الفاطميين، لأنهم أول من صنعوها وساعدوا في أنها تنتشر كنوع من التقرب السياسي للمصريين اللي توارثوها وطوروا فيها  لغاية الوقت اللي احنا فيه. 

جميل جدا… بس فيه حاجه لازم ناخد بالنا منها، وهي إن احنا مش لازم ناكل منها بكمية كبيره عشان  ديه ليها أضرار كتيره وبتأثر على صحتنا ، و ممكن نتعرض لمشاكل صحية كتيره بسبب ان احنا زودنا  في الأكل منها. 

طيب ايه هيا المشاكل الصحية اللي ممكن تتعرض ليها نتيجة أكلنا حلاوة المولد بكمية كبيره:

• بتسبب تسوس الأسنان لأنها بتكون فيها كميه سكر كتيره. 
• بيدخل في صناعة حلاوة المولد ألوان صناعية وديه بتضر بالجهاز الهضمي والتنفسي. 
• وأكيد طبعا هتزود نسبة السكر في الدم. 
• وده غير طبعا إن وزنك هيزيد جدا. 
• وهتزود نسبة الكوليسترول وده بياثر علي صحة القلب. 
• وكمان لما ناكل سكر كتير ده بيزود الأكتئاب والقلق. 

عشان كده احنا بننصحكم بأكلها باعتدال، ومن الأحسن أكلها في الصبح، لأن في فترة الصبح معدل الحرق بيكون أعلى من بليل.