منتجع صحي في مصر بيقدم خدمة غريبة جداً، بيعمل مساج للزبائن بتوعه وبيستخدم ثعابين بس غير سامة طبعاً.

صفوت صدقي هو صاحب منتجع صحي بيستخدم ثعابين غير سامة على الزبائن بتوعه و بيقول إن ده بيقلل من آلام المفاصل و العضلات وبيحفز ويحسن من الدورة الدموية.

والمفاجأة بقى إن معظم الزبائن اللي جربو الخدمة دي ومن ضمنهم ضياء زين اللي كان متحمس جداً أنه يجرب الخدمة دي وعرف عنها عن  طريق وسائل التواصل الاجتماعي، وقال أن المساج بالثعابين ده إداله دفعة من الثقة بالنفس والشعور بالاسترخاء والراحة التامة.

إيه اللي بيحصل بالظبط في المنتجع الصحي ده وبيستخدموا الثعابين دي ازاي؟!

أول حاجة بيدهنوا زيت على ضهر ووجه الزبائن و بيجيبوا 28 نوع مختلف من الثعابيين غير السامة أو الثعابيين الكبيرة المعروفة باسم البايثون و ديه غير سامة برضو.

وبعدين الثعابين دي بتبتدي تتحرك و تنزلق على الزبائن وده اللي بيديهم احساس الراحة و الاسترخاء.

 وده كله بيحصل في جلسة من 30 دقيقة مليئة بالراحة والاسترخاء والأدرينالين وده بسبب الملمس غير العادي للثعابين على جلد الناس. الخدمة دي في الأول كانت ببلاش كتجربة و بعد كده بقت الجلسة بتكلفة 100 جنية وبتتراوح من 25 لـ30 دقيقة.

دي طبعاً خدمة غريبة جداً ولكن ممكن تكون فعلاً فعالة.

قولولنا لو جتلكم الفرصة إنكم تجربوها هتجربوها ولا هتخافوا من الثعابين؟!

Image Credit: Reuters