خناقات الكورة مبتخلصش و التعصب مستمر بسبب سوء التنظيم و التصرف وقت الازمات. طب ايه اخر مشاكل الكورة؟ ايه اللي خلا الناس تتكلم فجأة عن شيكابالا تاني؟  ايه ملخص الموضوع؟ يلا نشوف 

اطراف المشكلة و بدايتها

1- هو الكابتن محمود عبد الرازق شيكابالا كابتن و قائد فريق الكرة لنادي الزمالك و بيلعب في نادي الزمالك بقالو اكتر من 18 سنة.

2- الاستاذ احمد مجاهد رئيس اتحاد الكرة اللي مسؤول عن تنظيم مسابقات الكرة في مصر

3- مراقب المباراة اللي كل دوره انه يشوف الاحداث اللي بتحصل اثناء الماتش و يكتبها في تقرير عشان يقدمه لاتحاد الكرة بعد كل ماتش و على اساسه بيتم اتخاذ اي قرار

الحكاية بدات يوم الجمعة 27 اغسطس من دخول اتوبيس الزمالك للاستاد و شيكابالا و لاعيبة الفريق لاحظوا ان الامن مش موافق على دخول اهاليهم و اللاعيبة زمايلهم اللي جايين يستلموا ميدالياتتهم و يتصوروا و بعض الجماهير و الصحفيين اللي اساميهم في كشف الدخول على البوابات.

الأزمة اشتعلت تاني لما راح  محمود شيكابالا لممر غرف الملابس ولاحظ أن الباب مقفول على أسر اللاعبين وأبنه وزوجته بالأضافة لمنع لاعبي الزمالك من الدخول. فطلب شيكابالا من مسئولي الملعب والأمن الخاص فتح البوابة والسماح لهم بالدخول، في وجود احمد مجاهد رئيس الاتحاد فرد مجاهد “ملكش دعوة دي مش شغلتك أدخل الملعب”.

 شيكابالا رد على مجاهد ” أنا كابتن الفريق ومسئول عن جميع اللاعبين أزاي مليش دعوة، ودول أهالي اللاعيبه وأبني وزوجتي”. و لما مجاهد رفض طلب شيكابالا رد شكيابالا “هنحتفل غصب عنك يا أهلاوي.. أحنا أبطال الدوري”.

 ترتيب الاحداث بعد الواقعة

1- نادي الزمالك نزل بيان بيشرح فيه اللي حصل و اكد على ضرورة فتح تحقيق قبل اي عقوبة خصوصا ان كل الاطراف غلطانة و دافع عن كابتن الفريق شيكابالا لانه بيقوم بدوره ككابتن للفريق.

 2- بعدها اتحاد الكرة نشر العقوبة اللي كان من نصيب شيكابالا فيها ايقاف 8 شهور و نص مليون جنية غرامة.. العقوبة اللي تخص اي لاعب يعتدي على حكم و ده اللي محصلش.

3- الزمالك بعدها نزل بيان انه هيتخذ كل الاجراءات القانونية لحفظ حقوق النادي و شيكابالا.

4- ظهور رئيس الاتحاد بعد الواقعة بيوم مع الاعلامي احمد موسى لشرح الموقف

5- ظهور شيكابالا مع عمرو اديب امبارح لتوضيح الرؤية اكتر

فين التناقض اللي مش مفهوم؟

احمد مجاهد رئيس اتحاد الكرة مع احمد موسى نفى الكلام ان شيكابالا شتمه و قال انه قاله يا اهلاوي و اللي ده ميعتبروش شتيمة و قال حق الزمالك يقدم تظلم عشان العقوبة تتخفض او تتلغي تماما, و رئيس نادي الزمالك الكابتن حسين لبيب اكد نفس الكلام و قال انه بيتمنى فتح تحقيق.

اول تصريح لشيكابالا

ظهر شيكابالا امبارح مع الاعلامي عمرو اديب في لقاء صنع ضجة و خلاف كبير من قبل ما يحصل و قال فيها شيكابالا كلامه كله عن كل الاحداث اللي حصلت و وجه رسالة مهمة لرئيس اتحاد الكرة الاستاذ احمد مجاهد

مش بس كده كمان شيكابالا وجه رسالة لجمهور النادي الاهلي اللي بينه و بينهم مشاكل

هنا بقا السؤال.. ازاي التناقض ما بين تصريحات مجاهد رئيس اتحاد الكرة و بين تقرير مراقب المباراة؟ و ازاي يصدر القرار بناء على واقعة تخص رئيس الاتحاد اللي اصلا نفاها؟ التناقض الاكبر في ان رئيس اتحاد الكرة نفسه هو اللي القرار بيعدي عليه قبل ما ينزل.. طب منين بيودي على فين؟ و ايه اللي هيحصل بعد كده؟