https://www.youtube.com/watch?v=mJ5NYS74Aow

زي معظمكم، نمت امبارح وانا مش قادر اصبر، عايز الليل يعدي والصبح يجي بسرعة، كنت مستني اشوف ما وراء الطبيعة علي نتفلكس، زي طفل مستني يلبس لبس العيد.

وبعد ما شفت اول حلقة… مش عارف…

عندي انطباع مشوش، ومش عارف ابدأ منين…

يلا نبدأ من الأول خالص!

لما سمعت ان نتفلكس هتنتج مسلسل مقتبس من احداث روايات أحمد خالد توفيق “ما وراء الطبيعة”، كانت ردة فعلي مضطربة، انا مش بحب أعمال احمد خالد توفيق ككل، ووضحت ده بإسهاب في مقال كتبته قبل كدا.

Paranormal: Excited For it, Yet I Can’t Stand Ahmed Khalid Tawfiq

اتكلمت عن الأسباب اللي خلتني محبش أدب توفيق، وليه رغم كدا كنت متحمس جداً للمسلسل.

أول كام دقيقة في الحلقة الأولي كانوا سهتانين بس وقفوا قلبي.

بداية الحلقة الأولي كانت هادية وسهتانة أوي، بس الرعب خلي دمي نشف. الطريقة اللي الكاميرا بتتحرك بيها في اللوكيشن والحدث التقليدي اللي كل التفاصيل المحيطة بيه مش تقليدية خالص، رعب!

عمرو سلامة لوحده، كمخرج للمسلسل، كان اقوي دافع اني اتفرج.

سلامة واحد من احسن المخرجين في مصر وعنده رؤية معاصرة تقدر تخدم الفانتازيا وتنقلها بشكل سلس علي الشاشة. ولأننا كمصريين معندناش فانتازيا حقيقية في السينما والدراما، ولأن الفانتازيا والرعب هما أكتر نوع بستمتع بيه، كنت متحمس جداً اشوف أول انتاج مصري علي نتفلكس مصنف كفنتازيا ورعب.

أحمد أمين كان احسن اختيار لدور رفعت اسماعيل.

الفانز لما سمعوا ان سلامة شغال علي كاستينج المسلسل اتحمسوا جداً لعبدالعزيز مخيون علشان يعمل دور رفعت اسماعيل. ولأن مخيون ممثل قدير وعنده كاريزما تقدر تأدي حلو اوي في شخصية رفعت اسماعيل وكمان عنده نفس تقاطيع وشه، كان هيكون اختيار عظيم للدور.

حتي الفانز عملوا بوسترز فيها مخيون كرفعت اسماعيل.

أنا شخصيا كنت فريق عبدالعزيز مخيون جداً. لكن اول ما شوفت أحمد أمين في اول بوستر رسمي للمسلسل انبهرت. وقلت لاء، هو ده انسب حد يعمل الدور.

رغم ان مخيون كان هيكون اضافة ضخمة جدا للدور الا ان سنه مكانش هيسمحله يملا فراغات كتير في الدور. في اجزاء كتير في الروايات كان رفعت بيتنطط فيها زي فرقع لوز ومظنش كان مخيون هيقدر يتنطط كدا. وكمان في فلاش باكز كتير لأيام الشباب. بالتالي فكرة اننا نجيب ممثل شاب وموهوب زي أمين هو الأنسب علشان يلعب الشخصية بكل تفاصيلها.

وأمين ميخيبش ظني خالص. الأداء كان فوق العظيم، انا كنت مصدوم، ازاي أمين لابس الشخصية حلو اوي كدا!

التفاصيل الصغيرة اللي كنت بتخيلها وانا بقري الروايات قدر يعملها زي ما يكون مولود وسط ورق روايات توفيق. وحتي صوته والشخصية الساخرة والنكت السوداوية والطريقة المتشائمة اللي بيشوف بيها العالم. معملش لفتة واحدة غلط. برافو بجد!

بما اننا اتكلمنا عن شخصية رفعت، تعالوا نفصص باقي الشخصيات!

الممثلين كانوا كلهم حلوين جداً واختيار موفق في الكاستينج، وتمثيلهم حلو ومقنع أوي. بالذات رئيفة، أخت رفعت.

الشخصية دي انا بعشقها خلاص. أكتر شخصية بحبها في المسلسل بعد رفعت اسماعيل علي طول. الشخصية القوية والمتسلطة، لكن حنينة وبتحاوط علي اخواتها وعايزاهم مبسوطين، اتيتود ماما اوي، بس كيوت! وفي طبقات من الشخصية تخليها منطقية جداً وحية.

تالت اكتر شخصية حبيتها كانت ماجي، رزان جمال عملت الدور حلو اوي، ونقلتلنا شخصية ماجي من الروايات بالظبط، ورغم ان في ناس علقوا علي اللهجة السكوتلاندية بتاعتها، إلا اني مخدتش بالي الحقيقة. انا بميز اللهجة الامريكاني من الانجليزي بالعافية. فمش هحط اي جادجمنت هنا.

الديكور والكوتيور ده جامد اوي يا نتفلكس، جايبينه منين؟

المسلسل عرف ينقلنا للستينات بجد، الديكور واللوكيشنز واللبس وحتي طريقة كلام الناس والاتيكيت مكانش فيهم غلطة واحدة، انا كنت قاعد بتفرج علي تفاصيل اللوكيشنز والفاشيون وبس في اول مرة، وده اللي خلاني شوفت اول حلقة تلات مرات. كل مرة كانت فيه حاجة معينة بتسرقني.

التفاصيل اللي من الواضح ان الانتاج تعب جداً علشان يعملها في الشوارع والعربيات القديمة وصوت الاذاعة وجريدة الجمهورية العربية المتحدة كان لازم نرفعلها القبعة. حتي التفاصيل الصغيرة جداً زي علبة سجاير كليوباترا اللي مع رفعت.

تاني مرة شفت الحلقة متمسمر قدام الفيجوال ايفيكتس وبالذات المشاهد بتاعت الاشباح، وطريقة الحركة اللي تحسسك انك قدام كيان مش بشري، وكمان الاضاءة مع اللوكيشنز خلقت جوي مصري قديم مليان رعب. هي بس الاضاءة خافتة اوي فلازم تشوف المسلسل في الضلمة علشان تعيش الجو.

وطريقة كلام الشخصيات مع انفعالاتهم وتفاعلاتهم الاجتماعية كانت مصرية اوي، وده خفف شوية من حدة طابع الرعب الغربي اللي كان هيسيطر علي المسلسل، بس برضه نرجع نقول ان ده اول انتاج فانتازيا ورعب مصري محترم ومش عيب يتأثر برواد النوع دع من الدراما.

الرعب ده حلو، في منه وحوش ومصاصين دماء؟

اننا نبدأ اول حلقة بأسطورة البيت كان شوية مش واو.. علشان مدانيش فرصة اشوف الحاجات اللي حبيتها في روايات توفيق. المستذئبين ومصاصين الدماء والحاجات اللي بتفرقع وبتطير دي. عايز اشوف دم واشلاء يا استاذ عمرو.

بس لسه في خمس حلقات تانين، يارب يطلع فيهم شوية وحوش من الحاجات الخطيرة بتاعت توفيق.

بس ككل يعني، الرعب مكانش فيه الاسلوب الرخيص بتاع الخضة والبووو، وده خلاني احترمت المسلسل جداً. الرعب مبني علي تسلسل الاحداث والحرق الهادي والبطئ للاعصاب. انا شخصياً اعصابي باظت.

حس الدعابة عندك يخوف يا دكتور رفعت!

هو عموماً، الكوميديا في المسلسل كلها كانت جامدة جداً، بس بالذات من رفعت اسماعيل كانت حاجة تانية. الطريقة اللي بيضحكنا بيها من غير ما يحاول حتي، لكن في لمسة مرعبة كدا في الكوميديا بتاعته، لمسة شخصية سوداوية ملعونة، في حاجة عدمية تخليك تضحك بس من جواك تفكر ان الدنيا دي مش مستاهلة، ويلا نقطع شرايينا يا جماعة!

ظهور خاص لقلبي، أحمد داش، في المسلسل.

احمد داش ظهر في اول حلقة. الولد جامد يا جماعة. ايه التمثيل والكاريزما دي؟

بس كدا، مفيش حاجة تانية….

نيجي بقي للجزء المفضل عندي في اي ريفيو، الكتابة عن الحاجات اللي معجبتنيش في المسلسل.

القصة ثم القصة، ثم القصة.

القصة كانت مش متماسكة، مش اجمد حاجة يعني. بس دي مش غلطة الانتاج قد ما هي غلطة روايات توفيق نفسها. يارب الفانز بتوعه مياكلونيش.

القصة كانت فيها فجوات كتير، واجزاء محتاجة تدرس تاني ويتعملها خطوط فرعية تكملها في تسلسل اكثر منطقية من اللي كان موجود.

بس المجمل كان حلو ومأثرش اوي في في المحتوي الكلي للحلقة.

العفاريت بتوعك مش عاجبني يا استاذ عمرو!

كان في مشاهد مرعبة جداً، وكان في اشباح بتتحرك بطريقة توحي انها مش بشر خالص. الظل والنور اللي بيلعب علي المشاهد خدم ثيمة الرعب الشبحية جامد.

لكن في حاجة مش مظبوطة في عفاريتك يا استاذ عمرو.

لازم تكون في خلفية للاشباح يمشوا عليها. يعني هما بيتحركوا كدا ليه؟ شكلهم كدا ليه؟ مش لازم توضحلنا ده، بس لازم تكون انتا عارفه ودارسه كويس في السيناريو، علشان الـOver all يطلع مظبوط وفيه تجانس وsymmetry. لكن الاشباح كانوا ملخبطين كدا وتايهين بطريقة خلتني حسيت ان في حاجة محتاجة تتظبط.

وكمان كانو محتاجين حبة غموض زيادة كدا، اصلهم عفاريت يعني، احنا مش جايين عمر افندي!

وفي شبح معين كدا، مش هنقول اسامي… اوك، شيراز! مكانتش عجباني … مكانتش عجباني خالص يا استاذ عمرو. لا تمثيل يرضي ربنا ولا بناء شخصية عدلة، ولا اي بتنجان، كانت مهزئة اوي. بس يغفرلها ان الكيوتنس دي مقدرش عليها… كيتي اوي!

العيال كلهم مكانوش عارفين يمثلوا، يعني مكانش ينفع نجيب عيال عارفة تمثل؟ مصر خلاص مفهاش خمس عيال يعرفوا يمثلوا؟

هو الصوت كان فيه حاجة ولا انا اللي مبقتش بسمع؟

هو الصوت كان واطي او انا خلاص معدتش بسمع تقريباً! مش عارف، هل ده كان جزء من التشويق والرعب؟

هو ده خدم فكرة ان مكانش فيه اسلوب الرعب الرخيص بتاع المزيكا العالية والخضات، بس خلاني عليت الصوت اوي وكنت احيانا محتاج اركز اوي علشان اسمع رفعت بيقول ايه. علي صوووووتك شوية يا دكتوووور رفعت.

اسطورة الباروكة الحمرا.

زي ما قلت قبل كدا ان شخصية ماجي كانت معمولة حلو اوي، بجد رزان ابدعت في الشخصية. بس ليه الباروكة الحمرا الوحشة اوي دي؟ ده كل حاجة في المسلسل حلوة، ليه تلبسوها باروكة؟ مكانش ينفع نصبغ شعر رزان؟ دي رزان بتقول انها سافرت شهر اسكوتلندا علشان تفهم لهجة وطباع الشعب علشان تعرف تعمل الدور. يعني تسافري شهر اسكتلندا ومش هاين عليكي تصبغي شعرك يارزان؟

وكمان باروكة شيراز السودا دي! البنت تقريباً كانت مش عارفة تعمل ايه ولا ايه، يعني تمثل ولا تشيل الباروكة، صعبت عليا اوي!

هو في العموم الباروكات كانت مصيبة في الحلقة، كان في كمية باروكات مرعبة اكتر من العفاريت.

كان في لمسة عمق كدا تحسها كلبوبة شوية.

هو عمق الدكتور رفعت كله كلبوب اوي، تحسه بوستات بنت عندها 15 سنة من بتوع وسط ناو وق جاليري، لابسه تيشيرت اسود عليه كوبلية مشروع ليلي، و حاجة من قبيل ” توقع ما لا يمكن توقعه، فإن حدث فهو ملكك وإن لم يحدث فهو ملك للأخرين”.. ايه؟  في ايه؟ امتي؟ ايه اللي حصل؟ مش فاهم حاجة.

وكله ولا قوانين مورفي دي! ده بالذات اكبر كلبوب في وسط ناو. كل قانون وقانون يطلعلنا بيهم رفعت من عند مورفي بيه، تشيزي اكتر من اللي قبله.

بس دي برضه تركيبة دكتور رفعت بتاعت احمد خالد توفيق. مش غلطة اخراج ولا انتاج. اللي عندنا يا باشا، هنعمل ايه!

الزتونة بقي: المسلسل جامد جداً، ومش هتندم انك اتفرجت عليه. بس بلاش أفورة في الاكسبيكتيشنز، علشان الأفورة مش هتخليك تستمتع باي حاجة، مش بس ما وراء الطبيعة. اتفرج علي المسلسل علي نتفلكس، علشان المسلسل شكله حلو اوي ونفسنا يعملوا منه مواسم تانية، علشان شكله بجد يستاهل، فنشجعهم بقي يكملوا انتاج!