ليه مسلسل موضوع عائلي احسن مسلسل عائلي مصري؟ مينفعش يفوتك

مسلسل موضوع عائلي من اول دقيقة في المسلسل و مش ببالغ هو قادر انه يوصللي احساس الاسرة ده و الدفء و قدر يقنعك علطول من اول حلقة انك جزء من الاسرة دي و عارف شخصياتهم كلهم و عايش تفاصيلها معاهم كانك واحد منهم على الرغم من ان النوع ده من الاعمال صعب جدا.

فا في الاول انا حبيت احيي مخرج العمل المخرج احمد الجندي و فريق كتابة ابهرونا في المسلسل ده ببراعة الحكي في عدد حلقات مظبوط بالملي.. يلا بينا نبدأ بالاداء التمثيلي

ماجد الكدواني

ماجد الكدواني في اول بطولة له بيقدم شخصية استاذ ابراهيم في المسلسل هو طباخ شاطر بيتفاجئ ان عنده بنت في سن الجامعة. حياته فيها جانب كوميدي في المسلسل من خلال عاداته بيحب ايه و بيكره ايه و المواقف اللي بيتعرضلها و بتبروزلنا الحاجات الظريفة اللي في شخصيته زي انه بيتخض من اقل حاجة و الطريقة اللي بيصحى بيها. و ده الجانب اللي بيخليك طول منتا شايف ماجد قدامك انت مبتسم و مبسوط.

و كمان عنده جانب كمان و هو الجانب الدرامي اللي بيظهرلنا من اول حكاية ماضيه مع مراته و حماه و شخصيته في الوقت ده لحد اكتشاف ان عنده بنت في سن الجامعة و هو ميعرفش. و ماجد في الجانبين دول الحقيقة عمري ما حسيت منه بتقصير او ان كان فيه شئ احسن يعمله -بالرغم اني مقتنع ان مفيش حاجة اسمها ممتاز بدون اخطاء- و لكن ماجد فعلا بخبرته كممثل تقيل بينتقي اعماله اللي كلها عايشة معانا لحد دلوقتي هو فعلا كان اقرب للامتياز من غير غلطة واحدة تذكر. قادر يضحكنا و قادر يخلينا نعيط في نفس المشهد بدون مبالغة فعلا.

رنا رئيس

رنا ممثلة تقيله قايمة بدور سارة اللي عاشت حياتها مع جدها و خالها من غير ام لانها ماتت و من غير اب. رنا على الرغم من صغر سنها من اول دور طلعت فيه في مسلسل وضع امني مع عمرو سعد و مسلسل ارض جو مع غادة عبدالرازق و ادوارها اللي بعد كده في كلبش و مؤخرا في نجيب زاهي زركش و موضوع عائلي كلها ادوار بتقولنا اننا قدام ممثلة كبيرة جدا و موهوبة اوي. انا مشوفتش شطارة كده قبل كده!

بينها و بين الممثلين التانيين كيميا حلوة اوي مع ماجد الكدوانى و طه دسوقى و سماء ابراهيم و دورها رغم انه درامي بدرجة كبيرة عشان هي بنت بتدور على هويتها و مين ابوها بعد ما مبقلهاش حد في الدنيا.

مابين بقا الدراما دي و المشاعر الصادقة اللي طالعة من عينيها لحد مشاهدها مع طه دسوقي و الثنائية الظريفة اللي كونوها مع بعض هي كانت هايلة و لو استمرت كده هتكون اهم ممثلة شابة في جيلها.

طه دسوقي

طه stand up comedian في الاساس و بيقوم بدور حسن ابن اخت ابراهيم اللي قايم بدوره ماجد الكدواني و هو شاب عايز يثبت نفسه في مجال ال stand up comedy في مصر لانه شغوف بيه و عايز يسيب مجال دراسته الاساسي. اكتر حاجة عجبتني في كتابة الشخصية هو استغلال شغلته الاساسية كجزء اساسي في شخصيته في المسلسل و ده اكيد ساعده كتير في مذاكرة الدور ده و انه يعمل تاريخ للشخصية لانها شبهه في حاجات كتير جدا.

طه مش هقول اني كنت بحبه و مقتنع بيه لا انا فعلا مكنتش مقتنع بيه اوي و لكن كنت بشوف الناس بتحبه و دوره في فيلم فرق خبرة خلاني احس اننا قدام ممثل موهوب فعلا و بيحاول يثبت موهبته دي للناس. لحد ما شوفته في مسلسل موضوع عائلي في دور مبني على انه بيقول ايفيهات مبتضحكش و لكن اعتمد على كوميديا المواقف و ردود افعاله الغير متوقعة على الاحداث.

طه كمان في المسلسل دوره مش انه شخص بيهزر و بس لا ده كمان فيه جزء انساني و رومانسي عجبني جدا جدا فيه و بجد مبسوط اوي بالتطور اللي هو بيحققه و نفسي يستمر عليه.

محمد رضوان

الراجل ده اكتشاف بالنسبالي لانه طالع في دور غير اي دور عمله قبل كده.. قايم بدوررمضان جوز اخت ابراهيم اللي قاعد في البيت علطول اللي كانت مشاهده فيها ضحك مش طبيعي رغم انه مش كوميديان ابدا و لكنه مصري اوي و شبه ناس كتير و عشوائيته احيانا في الحكاية هي اللي بتخليه كوميديان شاطر كمان.

محمد رضوان من اهم نجوم المسلسل ده فعلا لانه بيتعب و ربنا بيجازيه عن تعبه ده بنجاحه في المسلسل ده و حب الناس له.

سماء ابراهيم

سماء ابراهيم عامله دور زينب اخت ابراهيم و بجد مختلف عن اي حاجة هي عملتها قبل كده.. هي فعلا مش شبه خالص نهائي ولا عمرك تتخيل انه هي نفس الممثلة اللي قامت بدور رئيفة فى ما وراء الطبيعة و صباح فى شقة 6.. ممثلة كبيرة و قديمة و شاطرة و عاملة طاقة حلوة اوي في المسلسل.

محمد شاهين

محمد شاهين قايم بدور اسمه خالد و هو خال سارة اللي قايمة بدورها رنا رئيس. محمد شاهين ممثل جامد كده كده و قام بدوره باداء سهل ممتنع مبهر بجد.. انا اكتر دور فاكرهوله دوره في مسلسل الكبير و مسلسل الزيبق لانهم فعلا مميزين و اتمنى يكون المسلسل ده هو عوده لمحمد شاهين و بداية لادوار اكتر و احلى من قبل كده.