بيرجع تاريخ زراعة الأزهار العطرية المختلفة للحصول على العطور بما فيها ماء الورد لبلاد فارس الساسانية أو إيران حالياً.  وكان بيعرف هناك باسم “جولاب”: (جول) يعني ورد، و(اب) يعني ماء.

ماء الورد كان بيُستخدم من قديم الأزل واهتم بيه اليونانيون القدماء والرومان والفينيقيون وكانوا بيعتبروا حدائق الورود مهمة ومتقلش أهمية عن الأراضي الزراعية وحقول القمح وده طبعاً لأن فوائد ماء الورد كتيرة جداً وعظيمة.

بيتم استخراج ماء الورد من بتلات الورود نفسها عن طريق التبخير والتقطير، علشان نحصل في النهاية على مستحضر طبيعي بيُستخدم في حاجات كتيرة جداً. إما في وصفات الطعام أو كمشروب أو كمستحضر تجميلي للعناية بالبشرة والشعر، وبرضو في شركات عطور بتستخدمه في تركيبة عطورها لأنه طبعاً مش بيعمل حساسية ولا بيأذي البشرة.

ودي بعض فوائد ماء الورد واستخداماتها الكتيرة جمعنهالك علشان تبقي عارفاها:

تونر للبشرة:

ماء الورد هيبقى بديل هايل للتونر، لأن تركيبته فيها مواد مضادة للبكتيريا بتقلل من حساسية البشرة الملتهبة والمُعرضة للحبوب. وبيتحكم في الإفرازات الدهنية وبيقلل حجم المسام.

 بعد ما تستخدمي غسول البشرة، رشيه أو ضعيه على قطعة قطن وهتحسي إن بشرتك بقت نضرة أكتر.

استخدميه على المكياج:

كتير من خبراء التجميل بيستخدموا ماء الورد كأنه Primer لتجهيز البشرة للمكياج. أو ممكن تستخدميه على المكياج لو بقاله فترة طويلة وهتحسي بنضارة وكأنك لسة عاملة المكياج من وقت قليل. وده لأنه ليه قدرة عالية جداً على الترطيب وتوحيد لون البشرة وبيساعد كمان في الحصول على إشراقة مميزة.

بيقلل احمرار البشرة:

معروف عن ماء الورد إنه مضاد للإلتهابات وبيقلل من إحمرار البشرة والبقع الغامقة ممكن تستخدميه في روتين العناية بالبشرة الخاص بيك ويبقى آخر خطوة قبل النوم. ومع الاستمرار في استخدامه هيبقى في فرق ملحوظ.

مُرطب للشعر:

جفاف الشعر مشكلة بتعاني منها بنات وسيدات كتير. وعلشان تحلي المشكلة دي، ضعي بعض من ماء الورد على شعرك بعد الشامبو والبلسم. هتحسي كأنك عملت ماسك ترطيب عميق لشعرك ده غير إنه هيخلي رائحة شعرك جميلة جداً.

مُرطب للجسم:

بعد إزالة الشعر البشرة بتبقى ساعات فيها احمرار، ممكن تستخدمي ماء الورد لترطيب فوري وتهدئة للبشرة.

غسول للفم:

 استخدام ماء الورد كغسول هيساعدك في التخلص من التهابات اللثة والمحافظة على صحتها وتقويتها بصفة عامة. بس لازم تتأكدي في الحالة دي إن ماء الورد مش مُضاف ليه كحول أو أي زيوت تانية وإنه نقي وطبيعي.