كليوباترا وفيلم هوليوود الجديد: ليه جال جادوت مش مناسبة للدور ومين أحسن حد يعمله؟

القضية الفلسطينية شغلتنا طول حياتنا كجيل عاش بعد حرب اكتوبر وتاريخ طويل قبلها من الصراع العربي-الإسرائيلي.

محدش يختلف علي حقيقة ان الصهيونية هي عدو لكل العرب.

ورغم ان الكلام في القضية الفلسطينية عمره ما اتقفل، إلا ان السوشيال ميديا مؤخراً اتقلبت علي موضوع اختيار الممثلة الإسرائيلية جال جادوت في دور الملكة المصرية “كليوباترا” في فيلم هوليود الجديد.

هنتكلم هنا عن الاسباب اللي خلتنا حسينا بالإهانة من الكاستينج ده، وشوية حقائق تاريخية تثبت انه غلط.

مين هي كليوباترا؟

هي أخر ملكات المملكة البطلمية في مصر. مملكة البطالمة اتأسست علي ايد بطليموس الأول، واللي كان قائد في جيش الاسكندر الأكبر وأخد جزء من الشرق الأوسط وشمال افريقيا كميراثه من الاسكندر بعد موته.

بطليموس – زي الاسكندر الأكبر – أصله من مقدونيا، شمال اليونان، ونسله القوي من الملوك والملكات قدر يحافظ علي مملكته لفترة زمنية طويلة. لحد ما كليوباترا أخدت الحكم!

يعني من الأخر كدا البطالمة هما أول غزو أوروبي لمصر، مكانوش مصريين، كانو اوروبيين احتلوا بلد مش بتاعتهم ونصبوا نفسهم حكام علي ارضها. التاريخ الأوروبي التيبيكال!

طيب كليوباترا كدا كانت اوروبية؟

الموضوع ده لسه فيه جدل كتير.

أشهر تمثال مكتشف لكليوباترا موجود دلوقت في متحف هيرميتاج في سانت بطرسبرج، روسيا. والتمثال منحوت من حجر اسود.

التمثال دكان ه سبب تشوش للناس اللي مش عارفين التاريخ المصري القديم كويس، والسؤال كان: هل لون الحجر المنحوت يمثل لون بشرة كليوباترا الحقيقي؟

الباحثين في المصريات وطبقاً لجامعة اكسفورد، بيقولوا ان كليوباترا، ومن جهة والدها، هي الحفيد التامن للبطالمة في مصر. يعني قربها من والدها يخليها تقريباً يونانية، مقدونية بالكامل.

بالنسبة لعلاقتها بأمها: أول ست اجيال من البطالمة في مصر كانوا مش بيتجوزوا غير ستات يونانيين، مقدونيين. يعني لحد الجيل السادس من البطالمة في مصر، كانوا كلهم يونانيين اصحاب بشرة بيضاء بالكامل.

اتنين من اجدادها اتجوزا اخواتهم البنات علشان يحافظوا علي نقاء العرق الأبيض في الأسرة الحاكمة.

إلا ان امها وجدتها في احتمال شبه مؤكد انهم كانو مصرييات. والمصريين في الوقت ده، زي النهاردة، كانوا كلهم من اصحاب البشرة الداكنة، سمراء او سوداء. بس الاغلبية من اصحاب البشرة السمراء.

معني كدا ان كليوباترا اما انها كانت يونانية، مقدونية بالكامل، او كانت علي الأقل نصها مصرية.

وكون كليوباترا يونانية، مقدونية بالكامل، معناه ان بشرتها كانت تميل للون الزيتوني وشعرها كان غامق.

ومن المعروف ان ملامحها كانت تعتبر جميلة جداً بمعايير الجمال الخاصة بالزمن بتاعها. كانت مناخيرها واضحة في ملامح وشها ودقنها كانت عريضة وظاهرة جداً.

رؤية اكثر دقة لملامح كليوباترا

عالمة المصريات أن سالي كوتشر، استغرقت سنة كاملة في محاولة لعمل تصور دقيق بالكمبيوتر لملامح كليوباترا ودي كانت النتيجة.

بناءاً علي الصورة دي، كليوباترا كانت تشبه البنت المصرية التيبيكال اللي ماشية في كل شارع في بلادي.
وبالتالي احسن حد يعمل دور كليوباترا هي بنت مصرية.

جبنالك قائمة بكل البنات القمر اللي ممكن يعملوا الدور

1. روبي مثلاً…

روبي يمكن تكون انسب حد للدور ده. من أجمل البنات السمر اللي خدت الجمال المصري في كل ملامحها. وكمان ممثلة شاطرة جداً، قدرت تثبت نفسها في السينما والدراما.

2. أمينة خليل

البنت القوية، اللي قااااادرة. ملامحها المصرية وقدراتها التمثيلية الكبيرة، تخليها واحدة من احسن المرشحين للدور ده.

3. ياسمين رئيس

مفيش جمال مصري رايق كدا! وقدرت تثبت انها واحدة من اقوي الممثلات في مصر، مش بس في الجيل الجديد. بتاخد شغلها جد جداً وبتحضر لأدوارها وبتلبس الشخصيات حلو اوي.

4. هند صبري

حد هيقولي مش مصرية، هقوله لاء دي مصرية اوي، انت مشوفتهاش في عايزة اتجوز؟ الدكتورة علا عبدالصبور. ملامحها الشمال-افريقية اقرب ما تكون لملامح البنت المصرية الأصيلة. ومفيش اختلاف علي قد ايه هي ممثله عظيمة.

5. ياسمين صبري

الجمال والهدوء والرزانة والكاريزما والتمثيل اللي بجد. هنحتاج ايه كمان علشان تعمل كليوباترا؟

6. منة شلبي

المصري الأصلي بقي! القمر بتاعنا والممثلة العظيمة. واحدة من اهم المرشحات اللي تنفع للدور. مش هنقول فيها كلام كتير لأن محدش من القراء ميعرفش قيمة منة شلبي.