الفيلم اتصور سنة 2005 ولكن لم يتم توزيعه سينمائياً غير في 2011، وده بسبب مشاكل في الانتاج والمونتاج والتوزيع، المهم ان الفيلم حتي لما لقي توزيع سينمائي محدود مقدرش يحقق اي نجاح يذكر.

الفيلم واخد تقييم اقل من المتوسط علي مواقع التقييم.

ايه حكاية فيلم Megan is Missing؟

فيلم Megan is Missing بيتكلم عن بنت مراهقة اسمها ميجان ستيوارت بتقابل واحد اونلاين وبعد شوية وقت بتختفي وتبدأ صاحتها إيمي هيرمان رحلة البحث عنها.

ميجان بتطلع مخطوفة وبيتم اغتصابها وتعذيبها لحد ما تموت ونفس الشخص اللي خطف ميجان بيخطف صاحبتها اللي بتدور عليها وبيعذبها وبيغتصبها.

الفيلم متصور علي انه مجموعة فيديوها متجمعة من تليفونات وكاميرات تحقيق. والمشاهد في اغلبها فيها عنف شديد جداً ومشاهد تعذيب صادمة جداً، غير مشاهد الاغتصاب المرعبة.

ايه اللي فكر الناس بالفيلم؟

معظم اللي بيتداولوا اسم الفيلم علي تيك توك هما شباب قاصرين بيتحدوا بعض يشوفوا الفيلم، واغلبهم بيرجع يقول ان الفيلم سببله صدمة كبيرة وخلاه مش قار ينام او يتفاعل مع الأخرين.

الفيلم معمول بطريقة تخليه يحقق اكبر قدر من الصدمة النفسية للمشاهد بمجموعة من المشاهد الـ graphic.

ولأن الموضوع أخد شكل تحدي، خلاه انتشر أوي علي التيك توك وناس كتير بتتفرج عليه، وكمان علشان ردود افعالهم علي الفيلم بتكون مصدومة ومرعوبة، ده اداله قيمة اكبر في التحدي وخلاه انتشر بشكل اوسع بكتير.

طيب يعني الفيلم حلو؟ اشوفه؟

كواحد بيعشق أفلام الرعب والحاجات الـ creepy والـ Graphic، ممكن اقول أن الفيلم كويس، هو محتاج تمثيل احسن شوية، وممكن لو المخرج اعتمد ثيمة التصوير السينمائي التقليدي كان هيكون افضل!

انا شخصياً مش بحب ثيمة التصوير بتاعت كاميرا التليفون والهيبر ريليتي دي، بتخليني ازهق واحس اني بتفرج علي ستوري طويلة علي الإنستجرام وانا معنديش خلق لستوريز إنستجرامك لأكتر من 20 ثانية.

منصحكش تشوفه لو كنت بتتأثر بسهولة، خاصة أن الفيلم مزودهم شويتين في تصوير مشاهد الإغتصاب والتشويه.