عملية جراحية تمت، في المستشفي البيطري بكفر الشيخ، ل تحويل قط من ذكر لأنثي، بعد ما عاني القط المسكين من إنسداد في مجري البول بسبب عدوي بكتيرية تسببت في تكون حصوات.

بعد عمل سونار للقط وتحليل عينة من البول تبين أن مستوي الكرياتين في دمه زاد لعشر أضعاف المستوي الطبيعي، واللي كان خطر جداً علي حياته وهيسبب مشاكل خطيرة جداً في الكلي.

تفاصيل عملية عبور جنسي لقط في كفر الشيخ

بعد عملية جراحية استمرت ساعتين تحت التخدير الكلي قدر الفريق الطبي في المستشفي من إزالة العدوي البكتيرية مع أنسجة الجهاز التناسلي الكامل للقط الذكر، وتم بعدها تحويل مجري البول وتكوين قطاع داخلي شبه القطاع الداخلي للجهاز التناسلي للقط الأنثي، بإستخدام بقايا الجلد من الجهاز التناسلي الذكوري للقط.

ودي عملية تشبه أي عملية عبور جنسي لحد كبير وبيتحول فيها شكل الأعضاء التناسلية للقط من ذكر لأنثي.

بعد العملية فضل القط في المستشفي لليوم اللي بعده علشان يتابعوا حالته، وكان لازم يتم مراقبة وظائف الكلي بتاعت القطة كل تلات أيام لفترة، علشان يتأكد الفريق الطبي أن القطة في حالة صحية سليمة.

العملية الجراحية دي نادرة جداً وبتحصل في ظروف العدوي البكتيرية الشديدة اللي بتسبب تلف شديد في أنسجة الجهاز البولي والتناسلي للقطط، ومن خلال العملية دي بيتحول القط من ذكر لأني علشان ننقذ حياته.

يعني أيه قط يخضع لعملية تحويل جنسي؟

القطط اللي بتخضع للعملية دي بتتحول لأنثي بس مش بتقدر تخلف، لأن الإنجاب بيستلزم نقل جهاز تناسلي أنثوي كامل من قطة تانية.

كمان أوضح الفريق الطبي للمستشفي البيطري في كفر الشيخ أنه عمل عملية تانية لقط كان عنده عيب خلقي. القط كان عايش بخصية واحدة متعلقة في بطنه، ومع الوقت ده سببله ألام شديدة وأضطر الفريق الطبي لإزالة الخصية دي بعد ما عمل سونار وتحاليل طبية تفيد ضرورة إجراء العملية الجراحية، واللي تمت علي القط في حالة تخدير كامل.

عملية تحويل جنسي لقط تاني في أمريكا

في سنة 2019 أنقذت ممرضة أسمها كريستا لي، عندها 51 سنة، قط رمادي، أسمه لويس، من ملجأ الحيوانات اللي في مدينتها. بعد ما خدت القط لبيتها بكام يوم لاحظت هي وجوزها أن القط بيعمل بي بي ميا علي أرض البيت، والميا فيها نقط دم.

كشفت علي القط وبدأت تديله مضادات حيوية، لكن للأسف المضادات الحيوية مشتغلتش واضطرت تحجزله كشف طارئ مع الدكتور البيطري اللي قرر أن الجلد اللي حولين مجري البول متورم بشدة، وحصل تلف شديدة في أنسجة الجهاز التناسلي، وده اللي خلي الدكتور يقرر أن القط محتاج عملية طارئة لإنقاذ حياته.

العملية النادرة مكلفة جداً، وكلفت كريستا وجوزها $2,800 دولار. ولأنهم مقدروش يتحملوا المبلغ الكبير ده عملوا موقع علشان يجمعوا تبرعات لعملية لويس. التبرعات قدرت تغطي تكاليف العملية وتم بالفعل إنقاذ حياة القط المسكين.

بعد العملية فضل لويس عايش بطوق حولين رقبته علشان يمنعه من الوصول للجرح والتسبب بأي ضرر للعملية، وفضل الطوق معاه كذا يوم لحد ما الجرح بدأ يلم.

بعد العملية صحة لويس استقرت، لكن كريستا وجوزها فضلوا بيندهوه بأسم لويس، وقالوا أنه هيفضل بالنسبالهم لويس لأنه ده الأسم اللي يعرفوه بيه وبيحبوه.

كريستا وجوزها اتقابلوا علي جروب لمحبي الحيوانات الأليفة، وعندهم قطين تاني غير لويس، أنقذوهم من ملاجئ الحيوانات الأليفة.