بدأ بث قناة سبيستون في سنة 2000. يعني الوقت اللي اطفال التسعينات كانوا فيه عايشين طفولتهم بالظبط. ولأن سبيستون أول قناة عربية متخصصة في برامج الأطفال والكارتون، اتحولت لأيقونة الطفولة عند مواليد التسعينات وشكلت طفولتهم وعلمتهم وأثرت فيهم أكتر من مدارسهم نفسها.

ندخل علي شوية نوستالجيا ونفتكر مسلسلات الكارتون اللي كنا بنشوفها علي سبيستون!!

1 – أبطال الديجيتال

“نداءٌ إلي قاعدة الديجيتال….

صنديدٌ قادم”

الكارتون ده بالذات كان طفرة. القصة عن محموعة أطفال بيدخلو عالم رقمي علشان ينقذوه من أخطار بتهدد وجوده وسلامة الكائنات اللي عايشة فيه. يمكن أحلي جزء من المسلسل كان الأول. وكان من أهم اللحظات في المسلسل لما اكتشفنا أن هند، أخت أمجد، هي البطل التامن.

مين من أبطال الديجيتال كان المفضل عندك؟

كنت بتحب مين أكتر واحد في وحوش الديجيتال؟

2 – سابق ولاحق

اتنين اخوات بيدخلوا في مسابقات العربيات الصغيرة ودراما وأكشن كتير بقي. لاحق كان عاقل وهادي وبيخطط لكل حاجة وسابق كان عايز يفوز في السباق وخلاص، كان بيدخل بصدره وربنا يحلها من عنده يعني. فاكرين أيه مشكلة سابق في السباقات؟ كان مش بيعرف يعدي المنحنيات وغالباً العربية بتطلع برا المضمار وبتخرج من السباق، علشان كان بيمشي بسرعة ومش بيخطط للحاجات.

أنت سابق ولا لاحق؟

3 – أنا وأخي

“لا تنس أخاك، ترعاه يداك….

لو سرقت الأيام قلب معطاء بسام…

لن نستسلم للآلام”

المصايب اللي أخوه كان بيقع فيها والدراما اللي بتعيطنا في كل حلقة. يتحسب للكارتون ده أنه خلق حبكة درامية قوية جداً وقدر يحولها لمحتوي مناسب للأطفال. والأغنية بصوت الرائعة رشا رزق

4 – الحديقة السرية

” لحديقتنا في قريتنا باب ولها أسوار …

لا يعرف أحدٌُ ما فيها… تخفي عنا الأسرار”

الكارتون مبني علي احداث رواية الحديقة السرية 1911 بقلم فرانسيس هودجسون. الرواية بتحكي دراما موت زوجة وحزن زوج وطفلة يتيمة بتدور علي الإنتماء. لكن المعالجة الدرامية اللي حولت الرواية لمسلسل كارتون للأطفال كانت جميلة جداً استمتعنا بيها على سبيستون.

والأغنية بصوت هالة الصباغ.

5 – عهد الأصدقاء

الكارتون  اللي شارك معانا اللحظات الأولي اللي أدركنا فيها معني الصداقة وحسينا بوعينا كأفراد ومعني الفردية في مقابل الإجتماع والصداقة. المسلسل اللي بيتكلم عن أطفال الشوارع في لندن قبيل الثورة الصناعية. وتراجيديا صديقهم روميو اللي مات. الدراما والحزن ومغامرات الأصدقاء والعهد اللي اخدوه علي بعض.

وهو مسلسل ياباني عن رواية السويسرية “ليزا تيتزنر” واللي كتبتها باللغة الألمانية.

والأغنية من أعمال طارق العربي طرقان وفريقه.

6 – بابار

” نحن الخير بطبعنا، لا نرضي ظلم الضعيف…

لا يحيي بيننا إلا الإنسانُ الشريف

بابار فيل، ذكي نبيل …

وعالم الأطفال، عالمٌ جميل”

رغم سريالية الكارتون ده إلا أنه كان مشحون برسايل فلسفية في حبكات طفولية ذكية جداً.

والأغنية من أعمال طارق العربي طرقان وفريقه.

7 – دروب ريمي

“دروبٌ قد قطعتيها..

أفينا البعدُ أم فيها؟”

الكارتون الياباني اسمه Remi, Nobody’s Girl. وهو مسلسل كارتون قصير أتعرض علي سبيستون في 26 حلقة بس. مبني علي رواية فرنسية بعنوان Sans famille، أو من غير عيلة. ومشتق من المسلسل المشهور عالمياً Remi, Nobody’s boy.

8. بوكيمون

https://www.youtube.com/watch?v=HPGyNQ3k2hE

“أحلم دوماً أن أكون الأفضل بين الجميع…

لذا أجمع البوكيمون علي خير الصنيع.

سأسافر عبر الأرض.. باحثاً في كل مكان …

عن البوكيمون أداة السلام … “

المسلسل اللي سرق قلوب العالم كله وبقي ليه معجبين بالملايين في كل حتة في العالم. كان بيحكي عن ولد قرر يبقي مدرب لكائنات عندها قدرات خارقة اسمها البوكيمون وبيجمعها في كرات البوكيمون.

الأغنية بصوت رشا رزق.

9. المحقق كونان

فاكرين تتر المسلسل والمزيكا العظيمة؟

“يكتشف الغامض والمثير.

يستنتج بالعقل الكثير ..

كونان، الرجل الصغير .. يسعي دائماً”

المحقق كونان بدأ كسلسلة مانغا للكاتب غوشو أوياما واتحُوِّلت لمسلسل أنمي وحلقات أوفا وأفلام أنمي وألعاب فيديو ووسائط أخرى يابانية.

بدأت المانغا في 18 يونيو عام 1994 واتحولت إلى مسلسل أنمي في 8 يناير 1996 في اليابان.

ولحد النهاردة المسلسل لسه شغالة وشكلها مش هتخلص وكونان مش هيرجع يبقي سينشي كودو قريب.

السعادة اللي بنحس بيها لما بنشوف الحاجات دي دلوقت ولما بنسمع الأغاني بيرجع لإحساسنا كبالغين أن الحياة تقيلة والمسئوليات كتير علينا. والنوستالجيا دي بتدينا مخدر مؤقت بيدخل دماغنا في حالة شبيهة بأوقات الطفولة لما كانت الحياة أبسط ومسئولياتنا مش موجودة والواقع أقل كئابة.