سرطان الثدي هو مرض يصيب الستات والرجال، لكنه يصيب الستات بنسبة أكبر. واحدة من أصل كل 8 ستات معرضة للإصابة بسرطان الثدي.

الطب اكتشف انجازات عظيمة في مجال الكشف المبكر والعلاج وبالتالي نسبة الوفيات انخفضت إلي أقل من 12%. يعني أكتر من 88% من الستات اللي بيتشخصوا بسرطان الثدي بيقدروا يهزموا المرض ويكملوا حياتهم بشكل صحي.

علاج سرطان الثدي

زمان كان العلاج بيستلزم استئصال كامل الثدي، لكن دلوقت العملية دي بقت نادرة جداً وبتتعمل في حالات الضرورة القصوي بس. والعلاجات بقت كتير ومتوفرة.

الكشف المبكر أهم حاجة

كل ما قدرنا نكتشف وجود الورم في وقت بدرى كانت النتيجة أحسن، لأن الورم بيكون أصغر ولسه محصلش انتشار خارج الثدى نفسه، وبالتالي يمكن استئصال الورم فقط.  كمان فرص الشفاء التام هتكون أكبر ووسائل العلاجات المتوفرة هتكون أكتر.

علشان نكتشف المرض بدري، لازم كل ست تعرف أيه هي أعراض سرطان الثدي، علشان تاخد بالها وتلجأ للدكتور في الوقت المناسب.

أيه هي أعراض سرطان الثدي؟

قبل ما نتكلم عن الأعراض المرضية اللي ممكن تلاحظيها علي الثدي، لازم نقول أنك المفروض تعرفي شكل الثديين عندك كويس جداً. لازم تتعرفي علي جسمك كويس.

بصي في المراية وأحفظي شكل جسمك. ألمسي الثديين ودوري في كل الزوايا واضغطي علي الأنسجة. لازم تتعلمي عن جسمك وتفهمي شكل وملمس أنسجتك الطبيعية عامل ازاي، أكتشفي جسمك علشان لما تيجي تدوري علي أعراض غريبة تقدري تلاحظيها علي طول.

من أكتر أعراض سرطان الثدي المنتشرة (من بين الأعراض اللي في الصورة):

1- وجود كتلة صلبة مش بتسبب ألم: رغم أن معظم الكتل اللي بتتكون في الثدي عند الرجالة والستات بتكون مش أورام سرطانية إلا أن ده أكتر عرض شائع لسرطان الثدي.

2- وجود ثقوب علي جلد الثدي:هتلاحظي أن الجلد بدأ تتكون فيه حفر كتيرة.

3- افرازات من الحلمة: غالبا بتكون افرازات شفافة أو واخدة لون الدم.

4- جلد الثدي محمر وممكن تحسي بسخونة وممكن كمان حكة. 

5- هتلاقي في جزء من الثدي داخل جامد لجوة: ده بنسميه الصدع العميق. 

6- أنسجة الثدي تنشف ويحصلها تصلب. 

طيب أعمل أيه لو لاحظت الأعراض دي؟

لازم تشوفي دكتور علي طول. الدكتور هينصحك بالتحاليل اللازمة علشان يشخص الحالة. ولو كان التشخيص ايجابي: طلع في سرطان في الثدي فعلاً، هيبدأ معاكي برنامج العلاج وهيعرفك علي بدائل العلاجات المتاحة لحالتك.

مرحلة العلاج المرهقة

مرحلة العلاج ممكن تكون مرهقة جسدياً ونفسياً. أنتي بتحاربي المرض وهتهزميه. التغيرات اللي هتظهر علي جسمك دي جزء من الرحلة، ولما تهزمي المرض هترجعي زي الأول.

في حالات استئصال جزء من الثدي أو كامل الثدي، في عمليات ترميم عظيمة بقت ترجع شكل الثدي زي الأول بالظبط. مش هتحسي بفرق.

يمكن الإرهاق النفسي اللي هتمري بيه هيكون أكبر من أي حاجة تانية بتواجهيها في الوقت ده. أنتي شخص مختلف تماماً عن أي حد، ومشاعرك وطريقة استجابتك للموقف مش لازم تكون زي أي شخص تاني. ممكن تلجأي لدكتور نفسي يساعدك في الرحلة البطولية دي.