في سنة 2003 طلعلنا برنامج ستار أكاديمي، اللي كان مكسر الدنيا وقتها وعامل أضخم نجاح اعلامي في الوطن العربي.

البرنامج كان بيجمع شباب موهوبين من الوطن العربي كله، في مبني من تلات أدوار في لبنان، مع مدربين وبيخليهم يتنافسوا علشان يطلع منهم واحد كل اسبوع ، بتصويت الجمهور، لحد ما نوصل للنهائي والفائز.

شهرة البرنامج ترجع لأنه كان بيصور المواهب لايف وبيعرضها علي قناة خاصة بيه، وكانت حياتهم اليومية في الأكاديمية بتوصلنا لحظة بلحظة.

بقينا بنتفرج علي أول Reality TV في الوطن العربي وبنستمع باللحظات الخاصة والدراما وأحياناً الفضايح اللي بتتعرض علي الشاشة لايف.

عدي 17 سنة علي الموسم الأول من ستار أكاديمي؟

واحتفالاً بمرور 17 سنة علي ستار أكاديمي قررنا نجبلكم أخبار الستارز التمانية اللي وصلوا للنهائي علشان تعرفوا هما بقوا فين دلوقت وبقوا عاملين ازاي.

محمد عطية: الفائز بالموسم الأول

محمد عطية حقق شهرة كبيرة في البرنامج والناس كانت بتحبه جداً.

لما رجع مصر عمل كام البوم نجحوا شوية وبعدها دخل عالم السينما وعمل افلام فشلت جداً.

اخر ظهور لعطية علي السوشيال ميديا كان في مجموعة صور وستوريز علي الانستجرام مع ميرنا الهلباوي.

https://www.instagram.com/p/CGLarEXlfMO/?utm_source=ig_web_copy_link

وده اللي رجعه للأضواء تاني بعد ما نشر صوره مع ميرنا الهلباوي واعلنوا ارتباطهم ببعض، وET بالعربي عملت معاهم انترفيوا علشان يحكوا تفاصيل ارتباطهم بعد فسخ ميرنا خطوبتها مع عزت صبري بأقل من شهرين، وده بعد قصة حب جامدة أوي.

في صور عطية الأخيرة علي الانستجرام، ظهر بشعر فضي وجسم رياضي وحاجة أخر سيلفر داددي.

بشار الشطبي

المغني والملحن الكويتي، واللي وصل المركز التاني في الموسم الأول.

عمل البومين مع روتانا بعد ستار اكاديمي وبعدها فسخ العقد في 2008 وقال ان السبب إختلافات في وجهة النظر.

عمل كام مسلسل خليجي كدا برضه، محدش سمع عنهم حاجة في مصر. وبعدها اختفي تماماً عن الأضواء.

صوره علي انستجرام مؤخراً بتبين أنه تخنان شويتين.

بهاء الكافي

الممثلة والمغنية التونيسية بهاء، وصلت المركز التالت في الموسم الأول، ورغم انها كانت محبوبة جداً في البرنامج الا انها مظهرتش تاني في اي حاجة مهمة فعلاً بعد البرنامج.

اتجوزت في 2012 من واحد لبناني بعد قصة حب جامد وخلفت في 2016 بنتها جويا. ودلوقت بقت أم وبتنزل صور كيوت أوي مع أولادها وجوزها.

محمد خلاوي

https://www.instagram.com/p/BsrD4MRB2YN/?utm_source=ig_web_copy_link

 المغني والملحن السعودي، كان اسمه الزعيم في ستار اكاديمي وكان الطلاب بيحبوه اوي وكان من المتوقع انه ممكن يكسب، لكنه وصل المركز الرابع.

https://www.instagram.com/p/BcICIQ6jIMY/?utm_source=ig_web_copy_link

أعتزل الفن تماماً بعد وفاة مامته وفي اخبار انه شغال علي البوم جديد هيطلع قريب.

أحمد شريف

المغني التونسي اللي كان من اكتر الناس المحبوبة في البرنامج، وحقق نجاح كبير أوي بعد كدا وكان ممكن يكون نجم مهم جداً في الوطن العربي، ولكنه اختفي بسبب مشاكل عائلية.

حاول يرجع تاني مؤخراً بمشروع فني، بس ده كان مع بداية ظهور وباء الكورونا والمشروع للأسف منجحش.

صوفيا مريخ

مغنية مغربية، كانت ناجحة جداً بعد البرنامج بس اتجوزت رجل اعمال مغربي واختفت خالص عن الساحة.

وحتي صفحتها علي الانستجرام، رغم ان عندها اكتر من 37 الف متابع الا انها مش بتنزل صور كتير ومش نشيطة خالص.

مريم عطالله

لسه بتنزل البومات والأراء المحافظة بتهاجمها طول الوقت لأنهم شايفينها بتستخدم ايحاءات جنسية علشان تعمل لشغلها مكانة في الساحة الفنية وبيعتبروا ده حاجة مش مقبولة خالص.

سينثيا كرم

المغنية ومقدمة البرامج اللبنانية، بقت مشهورة اوي علي تيكتوك بالفيديوهات الكوميدية اللي بتعملها، والحقيقة هي دمها خفيف أوي.

اتجوزت زميلها في الموسم الأول “برونو” .

هيلدا خليفة

اللبنانية الجميلة دخلت مجالات كتير غير الغنا، وبقت واجهة لمنتجات كتير منها برسيل وغارنيه والويز.

فتحت محل ازياء اسمه NOIRO واتجهت كمان لتقديم البرامج ،ودلوقت هتستضيف مهرجان الجونة 2020.

شوفت عدي قد ايه وقت والناس اتغيرت وحياتها راحت سكك غير بعض ازاي! حسيت ان الوقت عدي بسرعة زينا! مين كان أكتر حد بتحبه في الموسم الأول؟