حوادث الخطف ازدادت مؤخرا و السوشيال ميديا اصبحت مكان مهم للاستنجاد بالدولة ووزارة الداخلية زي اللي حصل من امبارح مع دميانة ايمن على هاشتاج #دميانه_ايمن_طلعت_لازم_ترجع بس للاسف السوشيال ميديا و الهاشتاج كانو كمان وسيلة لابتذاذ الخاطف لاهلها و اصحابها.

ايه اللي حصل؟

هاشتاج #دميانه_ايمن_طلعت_لازم_ترجع تريند على السوشيال ميديا و فيه استنجاد من اهل و اصحاب بنت اسمها دميانة عندها ١٥ سنة اتخطفت و هي في طريقها للدرس من قدام مساكن اسكو في بهتيم يوم ٢٩/٤/٢٠٢٢ الساعه ١٢ الظهر.

الخاطف بيبتذ اهلها و اصحابها على السوشيال ميديا 

اصحابها واهلها نشروا كذا سكرين شوت من على جروب بتاع المخدومين بتاع الكنيسة لما كانوا بيسألوا بعض عنها لانها مختفية و اتفاجأوا بحد بيرد باسم دميانة على الجروب بيقول “من امتى الحب ده كله.. الجثة دي تلزمني” و طبعا الرد مش طبيعي فا كان استنتاجهم انها ابتذاذ من اللي خاطفها.

الموضوع موقفش لحد هنا لكن كمان الخاطف نشر status على واتساب دميانة لاهلها بيقول “دميانة كويسة بس مش هترجع” و استخدم كمان الفيسبوك بتاعها عشان يبعت نفس الرسايل.

لسه الموضوع مكملش ٢٤ ساعه و بنتمنى يكون فيه استجابة سريعة من وزارة الداخلية زي ما متعودين دايما عشان يوضحوا التفاصيل كلها و دميانة ترجع لاهلها.