كلنا بنعتبر أن شخصية دراكولا مصاص الدماء مجرد أساطير وخرافات، وكمان كتير من المؤلفين كانوا بيستخدموها في أفلام سينمائية وظهرت لأول مرة في رواية لكاتب ايرلندي اسمه برام ستوكر سنة ١٨٩٧، وكانت الرواية ديه مصدر إلهام لكتير من أفلام الرعب والحكايات المخيفة.

بس الحقيقة أن دراكولا ده شخصيه حقيقيه… بس يمكن الكثير منا ميعرفوش مين هو دراكولا الحقيقي، وأنه تولى حكم رومانيا في القرن الخامس عشر ، وكان بيعتبره الرومانيين بطل قومي لأنه أنقذ أوروبا من الغزو العثماني ، لكن مش كل الناس كانت بتعتبره بطل قومي ، فيه ناس تانية  كانت بتعتبره أنه مجرم قتل أكتر من 100 ألف شخص من غير شفقة ولا رحمة.

عشان كده فكرة مصاص الدماء  كانت مستوحاه من طبيعتة الوحشية وتعطشه للدم.

يالا بينا نعرف ايه هيه قصة دراكولا.. وايه اللي خلى أسمه يرتبط بمصاص الدماء.

أول حاجة لازم نعرفها مين هو دراكولا؟

اسمه الحقيقي” فلاد الثالث”، واتولد  “فلاد” في إقليم ترانسيلفانيا اللي بتتبع لمملكة المجر سنة 1431 ، وكان والده اسمه فلاد الثاني دراكول، وحكم” فلاد” ولاية “والايكا ” الرومانية لفترات متقطعة  استمرت 7 سنين ما بين 1455 و1478.

وعاش” فلاد”  فترة صعبة من فترات تاريخ أوروبا الشرقية ، بعد ما سقطت القسطنطينية على يد السلطان محمد الفاتح وبكدة البلقان كلها بقت  ساحة مفتوحة  قدام الجيوش العثمانية، وكمان بقي فيه نزاع دائم بين الأمراء عشان يحصلواعلى العرش.

و قدر وهو في سن صغيره ، لما بعته  والده ” فلاد الثاني ” هو وأخوه “رادوا” إلى السلطان العثماني بأدرنة بتركيا  كرهائن عشان يثبت ولائه ليه،  من أنه يدرس علوم المنطق والقرآن والأدب ،وكمان اللغة التركية العثمانية لدرجة أنه أتقنها اتقان تام ،وكمان اتدرّب على الفروسية وفنون الحرب، بس بسبب شخصيته الجريئة  كان بيتعرض للضرب والتعنيف من الأتراك.

وبعد وفاه والده ” فلاد الثاني ” تولي “فلاد” العرش واعلن التمرد علي الدولة العثمانية ، وكان بيستمتع  بتعذيب البشر بأشكال لايتوقعها عقل أي انسان.

طيب. .. ليه اتسمي فلاد الثالث بدراكولا وليه ارتبط اسمه بمصاص الدماء؟

اتسمي  بـ”دراكولا”، لانضمامه ل “عصبة التنين”،ودة كان اتحاد سري بيضم مجموعة من أمراء ونبلاء أوروبا الوسطى والشرقية عشان يواجهوا العثمانين وقتها ، واسم “دراكولا” باللاتيني  يعني”ابن التنين”، و في الرومانية الحديثة معناها “ابن الشيطان.

و احنا قلنا في الأول أن فترة حكم”دراكولا”،مازادتش عن سبع سنين وديه مدة قصيرة جدا مقارنة بأعداد البشر اللي قتلهم، والي وصلت لحوالي 100 ألف  إنسان، أغلبهم من الأتراك والبويار، وكان لقبه المشهور بيه “فلاد المخزوق” لأنه كان بيستخدم الخازوق عشان يقضي على خصومه، والخازوق ده هو اللي ابتدع الفكرة بتاعته وهي عبارة عن رمح بيدق في الضحية لغاية ماتخرج من عنفه.

والسبب الأساسي لارتباط اسمه بمصاص الدماء هو حبه الشديد للقتل وقلعته اللي كانت بتنشر الرعب وكمان طريقه قتله للناس بالخوازيق زي ماقلنا قبل كده.

وده جزء من الحكايات المشهورة عنه اللي خلت اسمه يرتبط بمصاص الدماء.

  انه خوزق راهب مع حماره، وكمان خوزق 500 شخص من اللي بينتموا  إلى الأسر العريقة.

جمع كل متسولين البلد وقدم لهم الأكل، وبعدين حرقهم وسلخ جلود رجلين الأسرى الأتراك  وبعد كده مسحها بالملح، وخلى الغنم تلحسها.

 هاجم مدينة براشوف الرومانية، الي بيسكن فيها البويار، للانتقام منهم، وأعدم حوالي 30 ألف من تجار المدينة وقادتها بالخازوق في صباح يوم الاحتفال بعيد القديس” برثولماوس”، بعد اتهامه ليهم  بالفساد والتآمر على “والاكيا” ، بعدها راح عشان يستريح  وياكل الغدا بتاعه وسط الجثث المتعلقة على الخوازيق، وسبها لغايه ما اتعفنت وده كان تحذير منه لكل واحد يفكر انه يخرج عن طاعته.

– في 1460  بعت السلطان محمد الفاتح رسالة إلى “دراكولا” بيطالبه بدفع الجزية المتأخرة عليه، واللي قيمتها ١٠ آلاف ، وكمان اشترط أن “والاكيا “تقدم خمسمائة من أبنائها عشان يشتغلوا  في الجيش العثماني، بس ” فلاد” رفض شروط السلطان العثماني لأنه مقتنع بأن قبول الشروط ديه واستمراره في دفع الجزية، يعني انه بيقبل  ضمنيا بالوصاية العثمانية على “والاكيا”،عشان كده أمر بتسمير عمائم الرسل العثمانيين على رؤوسهم بمسامير حديدية بعد ما  رفضوا خلعها في حضرته احتراما وإجلالا.

وغيرها  كتير من الجرائم، اللي  قتل من خلالها بين عشرين وثلاثين ألف إنسان، بس عشان يستمتع .

ازاي مات دراكولا؟

 لما وصل للسلطان العثماني كل الأعمال الوحشية اللي كان بيقوم بيها ، قرر أنه يتخلص من فلاد ويقتله، عشان يخلصوا البشرية من شيطان الإنس المتجسد فيه، فبعت الجيش العثماني عشان يقضي عليه، لكن هو هزمهم وكمان حط الجنود كلها على خوازيق ، بس في النهاية وبعد معارك كتيرة  عرفوا ازاي يشيلوه من العرش، واخد اخوه “رادوا” مكانه بس” رادوا “اتوفي فجأه  ورجع تاني “فلاد” للحكم، لكن المرة دي قعد في الحكم أقل من شهرين واتقتل في معركة ضد العثمانيين.

وبعد ما أتقتل فصلوا رأس فلاد الثالث عن جسمه، و بعتوا الرأس للسلطان العثماني محمد الثاني، اللي قام بعرض الرأس على خازوق خشبي في العاصمة العثمانية أدرنة، وقاموا بدفن اللي باقي من جثتة من غير أي مراسم جنائزية، وكان الناس بيرموا جثتوا بالحجارة كل مايعدوا عليها.

وبكده تكون نهاية  “دراكولا” هي النهاية اللي يستحقها علي خازوق، بعد ما تسبب بمقتل آلاف من البشر و بنفس الطريقة الوحشية.

والسؤال هنا هل ياترى ممكن تكون شخصية زي دراكولا ديه لسه موجوده في العصر اللي أحنا فيه ولا لأ، وهل لو موجوده فعلا ممكن انها تكون بنفس الوحشية اللي وصل ليها دراكولا.

وفي الحقيقة اللي أنا كتبته ده جزء بس من القصة، لأن فيها تفاصيل وحشية كتير، عشان كده اللي حابب يعرف أكتر عن قصة “ دراكولا ” ممكن أنه يدخل على موقع ويكيبديا  عشان يشوف اد ايه هو كان شخصية دموية ومتوحش.