مهم جدا ان عقلك يفصل في وسط المذاكرة عشان يرجع يركز تاني و دراسات كتير اتعملت بخصوص الموضوع ده بتقول انك المفروض تاخد بريك ربع ساعة لكل ساعة مذاكرة بتركيز…بس مهم في الساعة دي انك تشيل من جنبك كل القواطع زي التلفيزيون او الموبايل و توفر تركيزك للمذاكرة بس عشان لما تاخد بريك متبقاش بتضيع وقت.

لو مذاكرتك على اللابتوب او الموبايل ممكن تفعل خاصية موجودة في الاجهزة الجديدة انها تمنع وصول اي اشعارات ليك لمدة معينة انت بتحددها و بتبقا دي مدة المذاكرة قبل البريك.

لو المكان اللي بتذاكر فيه فيه تلفيزيون و انت من هواة مشاهدة التلفيزيون ممكن تفصل عنه الكهرباء خالص لحد ما تيجي تاخد بريك و ترجع تفصله تاني.

و عشان ده وقت عيد و محتاجين نبقا فريش و فرافيش جه وقت المكس الشقي اللي ممكن تعمله وقت البريك.

رشحنالك العاب مسلية

 شوف العاب عائلية بسيطة كتير زي بنك الحظ و الكوتشينة و حاجات كتير جديدة ممكن تلعبها من هنا تساعدك تخرج من مود المذاكرة.

اضحك.. اهم حاجة في الثانوية انك تضحك

شوف فيلم كوميدي زي ” وقفة رجالة ” و ” نادي الرجال السري” افلام العيد على منصة شاهد. و لو من عشاق مسرحية “مدرسة المشاغبين” فا هي موجودة دلوقتي ملونة مش ابيض و اسود على منصة شاهد برضو. و هنا رشحنالك شوية افلام حلوين كمان.

كل فشار في السينما

انزل اقرب سينما مع صحابك اوعيلتك و شوف فيلم جديد زي ” العارف ” لاحمد عز او   ” البعض لا يذهب للمأذون مرتين” لكريم عبد العزيز او ” مش انا ” لتامر حسني.

الدحيح بيشرح فيزياء

لو تايه في الفيزياء متقلقش انت مش لوحدك شوف حلقة الدحيح عن ال transistors هتبقا بتاخد معلومات تفيدك بطريقة entertaining باسلوب الدحيح.

ناكل بقا؟ ناكل

محدش مبيحبش الاكل.. استفيد بعروض المطاعم وقت العيد على تطبيقات زي Talabat و Elmenus.

المهم انك لما تفصل تعمل حاجة جديدة بتحبها تكسر بيها الملل.. و اه متكسلش انك تفصل.

هانت كلها ايام و هتخلص.