بيقولو دايما ان الفنان بيعيش اكتر من عمره سنين و سنين باعماله المؤثرة لان الفن ملوش عمر معين بينتهي تأثيره بعدها و دايما بتكون جملة “هيفضل عايش وسطنا باعماله الجميلة” بتتقال لما فنان مهم بيتوفى خصوصا لو الناس مرتبطة بيه جدا.

لو حبينا نقول مثال على ان الفنان بيفضل عايش باعماله الفنية سنين كتيرمش هنلاقي ممثل تكون سيرته فعلا بتعبر عن الجملة دي اد الفنان النمر الاسود “احمد زكي” الله يرحمه اللي النهاردة ذكرى ميلاده. حقيقي فقدناه!

لو هنحكي عن حياته و بدايته؟

هنلاقي انسان حياته ابدا مكانتش سهلة. احمد زكي اتولد في 18 نوفمبر 1949، في الزقازيق، وكان الابن الوحيد لوالده، اللي توفى بعد ولادته علطول. عاش يتيم، ورباه جده بعد ما تزوجت امه بعد وفاة زوجها، درس في المدرسة الصناعية وبعدها معهد الفنون المسرحية.

كانت بدايته من خلال دورعامل في خدمة الغرف في المسرحية الكوميدية “هالو شلبي”. و لكن حصل ظرف طارئ و الممثل الرئيسي مجاش اليوم ده. و هنا قدر احمد زكي، اللي كان بيبيع مشروبات غازية انه يكمل الليلة و استغل الفرصة لاثبات موهبته و خصوصا لما انتحل شخصية الممثل الشرير محمود المليجي اللي عجبت الناس كلها وقتها.

بعدها، كانت المحطة التانية من خلال “مدرسة المشاغبين” عشان ينطلق بعدها احمد زكي في دور البطولة في “العيال كبرت” سنة 1978.

عمل ايه احمد زكي؟

سؤال كبير و صعب اوي! هنبدأ من انهي دور عظيم عمله؟ هنبدأ من البواب ولا المحامي، ولا الوزير ولا الرئيس؟ مهو  عمل كل فئات الشعب و وصل لكل الناس.

لو حبينا نناديه باسم شخصية من شخصياته اللي لسه عايشة هنفتكرله السادات ولا طه حسين ولا العندليب ولا هدهد ولا حسن اللول؟

هنبدأ بأي عمل طيب؟ “شفيقة ومتولي” ولا “الهروب” ولا “موعد على العشاء” ولا “أنا لا أكذب ولكني أتجمل” ولا “الاحتياط واجب” ولا “البرئ” ولا “ضد الحكومة”

طب لو حبينا نحكي عن اعظم ادواره في محاولة لتلخيص تاريخه من الاعمال العظيمة هنقول “أربعة في مهمة رسمية” ولا “مستر كاراتيه” ولا “أيام السادات” ولا “معالي الوزير” ولا  “اضحك الصورة تطلع حلوة” ولا “سواق الهانم“؟

و مين ينسى استاكوزا؟ و”امرأة واحدة لا تكفي” و”البيضة والحجر” و “البية البواب” و”الراقصة والطبال” و  “زوجة رجل مهم” و “المدمن”؟ كلها حاجات متتنسيش. حقيقي امبراطور!

طب و عن اكتر المشاهد الخالدة في اذهان الناس؟ اكيد مشهد العقد العظيم

https://www.youtube.com/watch?v=7SAI2DsST1Y&list=WL&index=5

اللي لحد النهاردة بيتجاب و بيتشاف. اد ايه محتاجين الكلام ده دلوقتي من عم سيد. 

اومال لو هنتكلم عن احمد زكي الانسان و تأثيره في الاجيال؟

هنلاقي انسان عاش محبوب و توفى محبوب والناس دايما بتفتكره بالخير و ليهم ذكريات معاه. هنلاقي انسان بيمثل المعنى الحرفي لكلمة فنان من ثقافة و وعي و تأثير و موهبة.

هنلاقي انسان تأثيره في الاجيال مستمر لحد دلوقتي, هنلاقي اغلب نجوم الجيل الحالي بيتكلموا عن اد ايه هو اثر فيهم و اتعلموا منه كتير سواء اللي اشتغل معاه بجد او اللي قعد ذاكر اعماله و سمع سيرته من الناس و اتأثر بيها.

هنلاقي اول المتأثرين طبعا ابنه الراحل هيثم احمد زكي بيقول عنه 

لم أكن شخص مدلع، ولكن احمد زكي رباني على أن أكون راجل يواجه صعوبات الحياة، ولم يشعرني بأني ابن نجم وفنان مشهور متعالٍ على الناس أو بعيد عنهم، ولكنه علمني الاعتماد على نفسي منذ الصغر، فهو كان طيب وحنون القلب وتعلمت منه تقمص الشخصية قبل تقديمها

هنشوف كلام تلاميذه عنه اللي كان لهم حظ الوقوف جنبه و الشغل معاه زي منى ذكي و شغفها و هي بتحكي عن عظمة تقمصه لشخصياته و خصوصا شخصية السادات و تجربتها معاه في العمل

و عن موقفه في بدايات محمد هنيدي و مصطفى قمر و ازاي صاحبهم و علمهم و اثر فيهم و كان شغلهم معاه نقطة انطلاق ليهم في المهنة 

و مش بس تلاميذه اللي بيفتكروه بالخير اللي هما مش دول بس كتير زي كريم عبدالعزيز و شريف منير و محمد لطفي و غادة عبدالرازق.

لكن كمان زمايله من النجوم الكبار اللي انسانيته و طيبته كان ليها اثر كبير في حياتهم

لما نشوف الفنان الراحل نور الشريف بيحكي عن موهبته من ايام ما كان طالب في المعهد و نور الشريف معيد.

احمد زكي هو خطوة متطورة عننا شوية

https://www.youtube.com/watch?v=OWVvVsWNgXs&list=WL&index=13

و الفنان محمد صبحي بيحاول يوصف قدر موهبته من ايام المعهد

احمد زكي من اول وهلة كنت ارى فيه نجما

و الفنان يحي الفخراني بيشكره عن موقفه النبيل معاه في فيلم “نبيل و بلبل” اللي بينلنا اد ايه هو انسان طيب و جدع لما وافق انه يقدم التريلر بتاع فيلمه بصوته بدون مقابل

و عن ابرز الجوائز اللي حصدها

الامبراطور احمد زكي حصد جوايز كتير جدا عن فيلم «العمر لحظة»، و فيلم «طائر على الطريق» في مهرجان القاهرة، وجائزة عن فيلم «عيون لا تنام» من جمعية الفيلم.

و عن فيلم «امرأة واحدة لا تكفي» من مهرجان الإسكندرية عام 1989، وعن فيلم «كابوريا» من مهرجان القاهرة السينمائي عام 1990، وأحسن ممثل عن فيلم: «معالي الوزير» من مهرجان القاهرة السينمائي عام 2003.

اما عن اللحظة اللي احزنت اجيال كتير اتربت على افلامه و اتأثرت بشخصيته.. لحظة وفاته.

هنلاقي انسان طيب تأثر بانفصاله عن زوجته الفنانة الراحلة هالة فؤاد، اللي أنجب منها ابنه الراحل هيثم، والفراغ اللي سابته في حياته. عاش ايام صعبة و عانى من سرطان الرئة بسبب كثرة التدخين، لحد ما اشتد عليه المرض جدا وقت تصويره فيلم “حليم” و يتوفى في 27 مارس 2005.

حقيقي فقدناه و افتقدناه.. امبراطور السينما المصرية احمد زكي!

هل ممكن في يوم من الايام نشوف جائزة تقديرية بتمنح باسمه في مهرجان عريق زي مهرجان القاهرة السينمائي الدولي يليق باسم الامبراطور احمد زكي؟ اتمنى.