إمبارح كان في حريق في دمنهور في عمارة ومول تجاري..المصابين لحد دلوقتي ١٤ شخص من ضمنهم طفلة رضيعة. 

سبب الحريق كان أن أنبوبة أكسجين إنفجرت في عيادة في شارع عبد السلام الشاذلي  وراح مع الحريق ٤ شقق سكنية من ضمنهم عيادة تانية ومعمل تحاليل .. الإصابات فيها جروح من الدرجة الأولى واختناقات.

مع صدمة الحريق في ناس اضطرت تنط من على أدوار عالية بس عشان تنقذ نفسها! طب هل ده كان صح؟

في المقال ده هنقولكوا إزاي تتصرف في حوادث الحريق!

سألنا مهندس مكافحة حريق وقالنا إن أول حاجة لازم نبقى عارفين إن أي عمارة أو مول تجاري أو مستشفى بيكونوا قبل ما يبدأوا الشغل بيعدوا على تصاريح من الحماية المدنية زي إن يكون السلالم قريبة وشوية حاجات للأمان زي حساسات للحرارة والدخان وطفايات حريق وخراطيم مياه فا دي حاجة لازم تطمنا شوية. 

هو برضو نصحنا بشوية حاجات زي:

أول ما ندخل أي مكان نشوف فين لوحات التوجه في حالات الطوارئ

لو الكهرباء قطعت اللوحات دي بتكون منورة في الضلمة لو ملحقناش نشوف أول ما ندخل. قالنا كمان إن منستعملش الأسانسيرات ونستعمل السلم للأمان ونحاول نطلع الناس بره المكان على قد ما نقدر ونسمع كلام المسؤولين ومتخليش الخوف يسيطر عليك.

أستعمل طفاية الحريق في حالة إنك عارف إزاي تستعملها بس

عشان لازم تكون قريب من مكان الحريق وتكون قادر جسديًا إنك توجهها لتحت لمصدر الحريق عكس اتجاه الهوا وطبعًا رجها قبل الإستعمال. بلاش نستعمل الخراطيم المياه إحنا دي للمطافي والمتخصصين بس عشان ضغطها عالي. وأهم نصيحة قالها لنا إن لازم نسيب داخلة المكان فاضية عشان لما المطافي تيجي تعرف تدخل بسهولة. 

كمان سألنا دكتور صيدلي عن ايه لازم نعمله ونكون عارفينه:

لازم نشيل أي اكسسوارات من جسمنا زي سلاسل، خواتم، أي حاجة معدن عشان بتكون صعبة تتشال لو ساحت وبتزود المشكلة. 

تاني حاجة في حالة الحريق, نشيل أي هدوم ع الحريق إلا لو لزقت في مكان الحرق, كريمات الحريق تستعمل في خلال ساعتين من الحريق فقط. كمان نصحنا إن منستعملش تلج، الأفضل إننا نستعمل مياه من الحنفية عادي بضغط متوسط. بلاش نستعمل مطهرات لأن النار كده كده بتقتل البكتيريا. نصحنا إننا نغطيها ببلاستر أو قماشة ناعمة  لو مش قادرين وناخد مسكن لو وجعانا لحد ما نروح لمستشفى وطبعًا لو فيها فقاعات مينفعش نيجي جنبها. 

في الآخر نتمنى الشفاء لكل مصابيين الحادثة ووطبعًا بنطلب من المنشئات إن يكون في صيانة دورية لأدوات مكافحة الحريق عشان نحافظ على أرواح الناس.