حوادث الانتحار في الوقت الاخير في مصر بتزيد جدا و اغلبها من الشباب اللي بيتعرضوا لضغوط نفسية رهيبة بتخليهم يفكروا في الانتحار. و اخرهم حادثة انتحار بسنت خالد اللي هزت السوشيال ميديا لصغر سنها و عشان هي كانت ضحية لجهل كبير منتشر في المجتمع بيقضي على بنات كتير. ايه الحكاية و ازاي كنا ممكن كلنا ننقذ سلمى و ضحايا كتير قبلها؟ يلا نشوف

ايه اللي حصل مع بسنت خالد؟

اللي حصل ان الناس صحيت على صورة رسالة طالعة تريند لبنت انتحرت اسمها بسنت خالد 17 سنة من الغربية طالبة في تانية ثانوي ازهري بسبب ان كان في حد بيبتزها بصور ليها تضر سمعتها و هي مش حقيقية و قرر ينشرها في البلد قبل خطوبتها بفترة قصيرة عشان يضغط عليها مقابل أنه يقضي معاها موعد غرامي  تخيل؟

بسنت انتحرت بس سابت رسالة اخيرة لاهلها و تحديدا لامها اللي كانت سبب رئيسي في الضرر النفسي اللي وقع عليها.

ماما يا ريت تفهميني أنا مش البنت دي، ودي صور متركبة والله العظيم وقسماً بالله دي ما أنا، أنا يا ماما بنت صغيرة مستهلش اللي بيحصلّي ده أنا جالي اكتئاب بجد، أنا يا ماما مش قادرة أنا بتخنق، تعبت بجد

مدير امن الغربية تلقى بلاغ من ابو بسنت خالد 49 سنة بيقول ان بنته انتحرت عن طريق حبوب مسممة و بدا الموضوع ياخد طريقه القانوني و هيتم عرض بسنت على الطب الشرعي عشان يعرفو اسباب الوفاة بالظبط و لكن الموضوع موقفش لحد هنا و الناس بعدها على الفيسبوك و تويتر اطلقوا هاشتاج #حق_بسنت_خالد_لازم_يرجع بيطالبوا فيه بحق البنت الصغيرة اللي معاشتش لسه حياتها و لقبوها ب “ام ضحكة جنان” 

و كتب اهلها و اهل بلدها كفر الزيات رسايل و بوستات حزن على فراقها و اد ايه هي جميلة و متستحقش اللي جرالها و عايزين يجيبولها حقها من اللي ابتزها.

بعد ايه و فين البلاغ؟

اكيد مش هقول ان اهل البلد و اهلها مش زعلانين عليها و على اللي حصل لها و لكن هيفيد بايه الزعل لما يوصل لضرر نفسي كبير جدا جدا ممكن يخلي بنت عندها 17 سنة تفكر انها تنتحر؟ بتزعلوا ليه و انتو اول ناس مصدقتوهاش و موقفتوش جنبها؟ امها بتزعل ليه و هي من كلام بسنت خالد في جوابها واضح انها اكتر شخص خذلها و موقفش جنبها!!

هيفيد بايه ان كل اهلها يكونو زعلانين عليها و هي ميتة  و مدوروش علي حقها و هي عايشة و صدقوا صور معمولة عليها و كانو اكتر ناس ضدها؟ حتى لو الصور حقيقية ده ميديهمش الحق انهم يستبيحوا شرفها و سمعتها!

حتى لما بسنت خالد انتحرت كلام كتير في ردود الافعال بيقول طب و هي ليه تنتحر اصلا دي ايمانها ضعيف و ايه اللي يخلي اهلها يصدقوا عليها الكلام ده و اهل بلدها ما ممكن تكون البنت بتكذب و اكيد ناس كتير بتقول ده في سرها لكن طبعا ميقدرش يعلن غير انه حزين عشان محدش يتهمه بحاجة و يرمي الذنب من عليه

الانتحار كفعل ممكن ناس تكون ضده كتير لكن الانتحار مش فعل طبيعي و مش سهل ممكن ييجي في دماغ اي بني ادم بدون سبب.. الانتحار له اسباب كتير منها الضرر النفسي و الصدمة مش زي ما الناس ممكن تفتكر ان المنتحر ده شخص مريض عقلي او بيعاني من مشاكل نفسية و مش في وعيه! الانتحار من اهم اسبابه الضرر النفسي المتراكم اللي بيكون فيه الشخص المنتحر قبل ما يقرر الانتحار.

لو هنفضل نقول ليه مش هنخلص هنلاقي اسئلة كتير اوي ملهاش اجابة و هنلاقي تناقض كبير بيحصل! 

كنا ممكن نحمي بسنت و غيرها ازاي من الابتزاز؟ ببلاغ صغير

كنا ممكن نبلغ عن اللي بيبتزها و بيشهر بيها حتى لو الصور كانت حقيقية لان مش من حق حد انه يفضح اي حد و خصوصا انها بنت قاصر لسه 17 سنة و طرق البلاغ كتيرة و سهلة و عقوبة الابتزاز و التشهير بتكون حبس و غرامة لتعويض الضحية.

1. الاتصال على رقم 108 مخصص لجرائم الابتزازاو 0224065052 او 0224065051
2. ممكن نروح القسم علطول بتاع المنطقة و نعمل بلاغ و نقدم الادلة على الكلام ده و في حالة بسنت بنقدم الصور اللي تم نشرها ليها
3. يجب تقديم البلاغ في خلال 3 شهور من حصول الابتزاز طبقا لنص المادة 3 من قانون الاجراءات الجنائية

ايه ردود فعل الناس بعد الحادثة؟

#حق_بسنت_خالد_لازم_يرجع
حسبي الله ونعم الوكيل ف أهلها وفي ابن الكلاب ده pic.twitter.com/vALhf6ALTL

— OLA (@Ola_Shabana77) January 3, 2022

There is a sad story in Egypt of a 17-year-old girl, and her name Basant. Malacca She was harassed and threatened by posting her pictures on the Internet She did not bear and decided to commit suicide. This is her message before her suicide💔 #Egypt #حق_بسنت_خالد_لازم_يرجع pic.twitter.com/EFG2a6PIkv

— Faiyas90 (@faiyas90) January 2, 2022

Speechless #حق_بسنت_خالد_لازم_يرجع https://t.co/EW3m4JQ0PI

— fadyy (@IIIhghghg) January 3, 2022

الموضوع ثقافة شعب من ايام قضية الفيرمونت 2015

الموضوع مش بسنت خالد بس لا فيه غيرها كتير حصل مؤخرا و بيحصل من زمان لكن فعلا فيه حقوق كتير لبنات في الارياف و مش بس في الارياف مهدورة. الواقعة دي اكيد لو كانت حصلت مع راجل كان هيتقال ماهو راجل الكلام ده مش هيضر بسمعته و مايعيبش الراجل الا جيبه و الكلام الفاضي ده لكن الكلام على بنت و البنت بما انها عزيزة اوي عند بعض الشعب المصري قرروا يدبحوها زي ما دبحوا بنات كتير ملهومش ذنب قبلها بالظلم.

قضية الفيرمونت و الفيديو المنتشر من 2015 و محدش فكر حتى انه يبلغ و يجيب حق البنات دي و مفتكروش القضية الا بعد سنين كتير جدا و قعدوا يدوروا على الفيديو عشان يثبتوا حق البنات فيها! القضية دي تحديدا اللي كان لو اول واحد شاف الفيديو راح مبلغ كان حق البنات جه في ثواني و نبقا انقذنا سمعة بنات في مجتمع بيظلم البنت في اوقات كتير جدا اكتر ما بيديها حقها!

ناس ممكن تقول انت راجل ازاي تقول البنت بتتظلم في مجتمعنا و ده من ضمن كلام كتير بينم عن جهل و عدم وعي.. الحق حق و البني ادم العاقل قادر يميز مابين الحق و الباطل و عارف يقول ايه امتا! بس فعلا لو عايزين نتقدم و يبقا فيه تحضر مش هنفرق مابين حق البنت و حق الراجل الاتنين في حياة كريمة بشرفهم و بدون تدخل في حياتهم و التشهير بيهم!

ليه الناس مبتبلغش؟ و ليه بنستني لحد ما حق الضحية يروح او تقرر تنتحر؟و لحد ما نوصل لكام ضحية الجهل و الخوف هيفضل منتشر بيننا؟

اللي بيقدم بلاغ بيبقا بطبيعة الحال طرف في القضية لحد ما تتقفل و بيكون دوره مهم اوي لكن للاسف الموضوع بقا مخيف لاغلب الناس اللي هو “انا ادخل نفسي في مشاكل ليه انا مش ناقص” و بينسى ان كلنا لينا دور في حماية حقوق بعض عشان نعيش في مجتمع صحي. ميعرفش او بينسى ان البنت اللي هو كسل يبلغ ليها عشان يحمي حقها او يمكن خاف يبلغ ممكن تكون بنت من بناته او اخته. الخوف بقا مسيطر على ناس كتير جدا بطريقة بشعة و الموضوع مش مفهوم خصوصا ان انت لو بلغت و انت معملتش حاجة ليه تخاف؟

لو فعلا بنقول ان المجتمع اتغير و خايفين على عاداتنا و ثقافتنا فا لازم نخاف عليها من نفسنا و نقيم نفسنا قبل ما نخاف عليها من الافلام و المسلسلات اللي بنشوف عليها ااعتراضات كتير و بنشوف ساعتها البلاغات بقا بتتقدم و تروح و تيجي تحت مظلة “بنحمي ثقافتنا” و هي في الاساس دواعي مزيفة ممكن يكون هدفها التريند و الشهرة.

حق بسنت راجع خلاص و تم القبض على اللي فبرك صورها و ابتزها

القانون المصري في صف الضحية دايما و خصوصا النوع ده من القضايا حتى لو بنتمنى تغليظ عقوبة الابتزاز و التشهير اكتر. الرقم سهل: 108