هل فكرت قبل كدة إزاي تتعاملي مع حماتك أو إيه هي الطرق الصحيحة لتصرفاتك واللي متسببش أي إحراج لك أو لها؟

كتير بنتعرض لمواقف مش بنبقى عارفين إزاي نتعامل من خلالها خاصة لو كنت عروسة جديدة، ساعات هتحسي إنك مش عارفة أيه هو الرد المناسب اللي ميأثرش على العلاقة بينكم. معروف في الوطن العربي إن الحماة بتكون شخصيتها صعبة شوية وإنها علاقة صعبة لازم يحصل فيها مشاكل. ولكن في الحقيقة الكلام ده مش دائماً صح، فلو كنت حكيمة في ردود أفعالك واتعاملت بطبيعتك من غير مبالغات أو تعقيدات ممكن تكون من أنجح العلاقات. هنقدملك في المقالة دي شوية نصائح عن اتيكيت الحديث مع حماتك في مواقف مختلفة علشان نساعدك في إنها تكون بمثابة أم ثانية لك من غير أي مشاكل أو توتر.

كسر حاجز الصمت

دائماً بتبقى في لحظات صمت في أي علاقة جديدة، وبيتوقف ده على وجود حاجات مشتركة تتكلموا فيها ولا لأ. فلو كنت بتزوريها لوحدك مفيش داعي تخلي المقابلة مملة بسبب الاستسلام للحظات الصمت وانك مش لاقية حاجة تقوليها، هتحسوا على طول انكم متضايقين ومش قادرين تتواصلوا. ننصحك في الحالة دي أنك تعرفي إيه هي الحاجات اللي تهمها أو إيه هواياتها المفضلة من خلال سؤال الزوج ومش بالضرورة أنك تعرفي كل كبيرة وصغيرة بس المواضيع اللي تقدري من خلالها انك تعملي محادثة لطيفة معاها.

التسمية بالاسم المُفضل

بلاش أبداً تنادي حماتك باسم الدلع في أول لقاء بينكم على سبيل التودد. مش كل الناس بتتقبل ده بالعكس ممكن يعتبروها نوع من قلة الاحترام. علشان كدة لازم دائماً تلتزمي بالألقاب لحد ما هي تطلب منك عدم التكلف. ووقتها تقبلي ده وتناديها بالاسم اللي تحبه.

اقبلي النصيحة والنقد بصدر رحب

تقبلي دائماً النصيحة بصدر رحب، طبعاً حماتك هتحب دائماً إنها تنصحك بخصوص الزواج أو الشغل أو تربية الأطفال. متبينيش انك رافضة وتقبلي لأنها سبقتك في الموضوع ده وعندها خبرات أكتر وفي الأغلب بتكون النصيحة بنية طيبة وبغرض المساعدة، أما لو حسيتي بأنها بتتدخل بشكل صريح في حياتك الشخصية برضو مترفضيش بطريقة مش حلوة ولكن اشكريها بلطف على اهتمامها واشرحي بطريقة مهذبة أنك عرفت تتصرفي في الموضوع ده بالطريقة اللي بتناسبك وتناسب ظروفك. ولما يكون في نقد اتعلمي انك تتقبليه ومتفكريش بطريقة تحسسك بالضيق. يعني مثلاً لو عملت عزومة وفي صنف معجبهاش، بلاش تبيني انك متضايقة بسبب رأيها. فطرق الطبخ بتختلف من شخص لآخر وممكن تكون حماتك مش بتحبه بالطريقة دي فتقبلي ملاحظاتها.

لازم يكون في شوية ود وامتنان

لما حماتك تعمل حاجة لطيفة أو تجيب لك هدية لك أو لأولادك لازم تبيني انك مقدرة اللي هي عملته من خلال مكالمة تليفون بسيطة ومتأجليش المكالمة لحد ما تتقابلو علشان تكسبي ودها وتشوفك دائماً بطريقة إيجابية.

لبدنك عليك حق – 5 حاجات مهمة بخصوص صحة الجسم