الكمامة الطبية بقت جزء لا يتجزأ من حياتنا اليومية وبقت قطعة أساسية نرتديها بشكل يومي علشان نقدر نحمي نفسنا على قدر المستطاع من مرض كورونا المستجد أو ما يُطلق عليه Covid-19.

بس الحاجة اللي مش كل الناس عارفاها إن أصحاب النظارات سواء الشمسية أو النظر وبالأخص النظر بيعانوا وبيواجهوا تحدي كل مرة يرتدوا فيها الكمامة الطبية.

ودة لأن بمجرد ما الشخص بيرتدي الكمامة الطبية بيتكثف هواء الزفير وبيخرج من الحافة العلوية للكمامة على عدسات النظارة بطريقة مباشرة. وطبعاً ده بيخلي الرؤية مش واضحة، فبيضطر الشخص إنه يشيل الكمامة أو يقلع النظارة وفي الحالتين الموضوع مش هيبقى مريح ليه.

بس مفيش داعي للقلق، إحنا جبنالكم حلين عمليين جداً علشان نساعدكم في المشكلة العويصة دي. عرفناهم من اثنين دكاترة جراحة في لندن كانوا عاملين بحث بيوضحوا فيه إزاي يقدروا يحافظوا على نقاء عدسات النظارات الطبية الخاصة بيهم أثناء إجراء العمليات الجراحية.

الحل الأول:

غسل النظارات بالماء والصابون قبل ارتداء الكمامة الطبية مباشرة وترك النظارة تجف في الهواء أو مسحها بمنديل ناعم وبعدين نرتديها على طول.

وفي شرحهم للحل ده، وضحوا إن الضباب ده بيحصل نتيجة بخار الماء الدافىء اللي بيخرج أثناء التنفس وبيتكثف على سطح العدسة البارد. ولكن لو غسلنا العدسات بالصابون هنساعد في تكوين طبقة رقيقة عازلة هتقلل من عملية التكثف. لأنه بيمنع بخار الماء إنه يكون قطرات كبيرة على العدسة واللي بتحجب الرؤية وبتساعد على تشتيت جزيئات الماء بالتساوي في طبقة شفافة.

ويُقال إن صابون الأطباق هو نوع الصابون الأكثر فاعلية. وبكدة المفروض العدسات مش هتبقى ضبابية عند ارتداء الكمامة.

الحل الثاني:

في دراسة تانية اتعملت في أمريكا رشحت وضع شريط لاصق على الأنف وده هيشكل حاجز ما بين حرف الكمامة العلوي وعدسات النظارة. وده في حالة ارتداء الكمامات اللي بيتم تثبيتها خلف الأذنين.

أما لو كنت بترتدي الكمامة اللي ليها شريطين حول الرأس زي بتاعة الدكاترة أو اللي بترتديها المحجبات، فالطريقة اللي بتنصح بيها الدراسة دي هي ربط الشريطين عكس بعض. يعني الشريط اللي المفروض يبقى فوق الأذن هيبقى تحت الأذن واللي تحت الأذن هنخليه فوقها.

و لما نربطها بالطريقة دي، مش هيبقى في ضباب على العدسات. لأن الربطة دي هتساعد في إننا نقفل المنطقة اللي عند الأنف بإحكام أكتر وهيكون في زي فتحتين تهوية من عند الخدين وده هيسمح للزفير إنه يخرج من المنطقتين دول بدل ما كان بيطلع من عند الأنف ويتكثف على العدسات.

جربوا بنفسكم الطريقتين وقولولنا أنهي واحدة نفعت معاكم في التعليقات هنا.

آخر تحديث للأعداد الرسمية للإصابة بالكورونا في مصر.