من كام يوم ظهرت مشكلة جديدة كانت تريند على السوشيال ميديا و هي مشكلة اغنية للي لمحمد منير في اول تعاون له مع اكرم حسني و اللي اتقابلت باتهامات سرقة لحن و كلمات و كان كل شوية يظهر حد ينسب اللحن او الكلمات لنفسه و يقول انها مسروقة منه غير اللي اتهمها بجهل انها مسروقة من الفلكلور، رغم ان دي مش تهمة اصلا، و ان اساسا اكرم حسني اللي كاتب و موزع الاغنية قايل ده.

ليه الاستعانة بالفلكلور مش تهمة اصلا؟

عشان في تعريف كلمة فلكلور، الفلكلور هو مجموعة الفنون القديمة والقصص والحكايات والأساطير المنحصرة ضمن عادات وتقاليد مجموعة سكانية معينة في بلد ما. تُنقل المعارف المتعلقة بالفلكلور من جيل إلى جيل آخر عن طريق الرواية الشفهية غالباً، وقد يقوم كل جيل بإضافة أشياء جديدة أو حذف أشياء لتتوافق في النهاية مع واقع حياته التي يعايشها وهذا الإبداع ليس من صنع فرد ولكنه نتاج الجماعة الإنسانية ككل في مجتمع ما.

فيما معناه، الفلكلور ملك للشعب و اي حد ممكن يستفيد منه و يعدل عليه كمان عشان كده عمرنا ما شوفنا محمد منير بيتقال عنه سارق لحن او حتى كلمات لانه عمره ما عمل كده هو كان بيستعين بالفلكلور عشان يقدمه بتصرف و رؤية فنية معاصرة زي ما مفهوم الكلمة بيقول: انها بتتغير في كل عصر و ملهاش قواعد. 

ده غير ان اللحن متسجل رسميا باسم اكرم حسني كحقوق ملكية فكرية

الاغنية لحنها متسجل في حقوق الملكية الفكرية باسم اكرم حسني و هو الشخص اللي ورا اغلب الاغاني الهيت و الاعلانات كمان مؤخرا غير نجاحه كممثل. اكرم مأنكرش الاستعانة بالفلكلور لانها مش تهمة و قال ان اجزاء من اللحن فلكلور صعيدي فعلا و لكن قال انه اتقدم بتصرف و برؤية فنية مختلفة تليق بمحمد منير و لو كان يعتبر سرقة مكنش اللحن اتسجل و كان القانون اجبره ينسب اللحن للفلكلور (لكن ده محصلش).

و بالنسبة لمحمد منير فا هو تاريخه و اكتر اغاني معروف بيها هي اصلها من الفلكلور سواء النوبي او السوداني او حتى التونسي و الجزائري و مش هو لوحده اللي غنا الحان من الفلكلور و لكن هو اكتر حد تميز فيها.

عشان كده قررنا نجمع اشهر الاغاني اللي غناها الكينج محمد منير و اللي اصلها كان فلكلور شعبي.

اغنيه في عشق البنات (2000)

و دي كلمات و الحان فلكلور سوداني

اغنيه انا قلبي مساكن شعبيه (2001)

و هي من كلمات محجوب شريف و مستوحاه من الفلكلور السوداني

اغنيه سو يا سو (2001)

و دي كلمات كوثر مصطفى و الحان فلكلور نوبي

اغنيه شمندوره (2003)

و هي من كلمات احمد المستشار و مستوحاه من الفلكلور النوبي

اغنية فات الكتير (2015)

و هي من الحان و كلمات شاعر المقاومة كابتن الغزالي.

اغنية تحت الياسمينة (2013)

و هي فولكلور تونسي

في النهاية محمد منير نجم مش قليل عشان يضطر انه يسرق عشان ينجح و تعاونه مع واحد من ابرز نجوم الجيل الحالي اكرم حسني اللي اثبت نجاحه في التمثيل و كمان الاغاني هو دليل على وعيه بالتغير اللي بيحصل في الفن و بمعادلة النجاح مع الجيل الحالي من الشباب.