تحديث بتاريخ 18 سبتمبر 2020: ظهور قرار المحكمة في قضية بهاء سلطان ونصر محروس

عقد الاحتكار اللي بين طرفي القضية بينص علي أن شركة فري ميوزك (لصاحبها نصر محروس) هتقوم بانتاج تلات ألبومات لسلطان. الأزمة في العقد أنه مش بيشترط فترة زمنية محددة للإنتاج. يعني ممكن يتم انتاجهم في سنة أو 100 سنة. في نفس الوقت لو سلطان حب يفسخ العقد لازم يدفع لفري ميوزك 1.5 مليون دولار أمريكي شرط جزائي. طبعاً العقد كدا ممكن يقعد سلطان من غير شغل طول حياته لو محروس عايز.

العقد تم في سنة 2009، وتم بالفعل تسجيل ألبومين مع فري ميوزك. الألبوم الأول نزل في 2013، وده كان أخر ألبوم نزل لسلطان. الألبوم التاني اتسجل بالفعل بس منزلش السوق.

من 2017 وسلطان رافع قضية علي محروس لفسخ عقد الاحتكار. وخلال اليومين اللي فاتو تم نشر بوست علي صفحة سلطان علي الفيسبوك بتقول أن العقد اتفسخ بالفعل بحكم قضائي. بعدها بكام ساعة محروس نزل بوست علي صفحته بيقول أن المحكمة حكمت لصالحه هو. وظل السؤال: أيه اللي حصل في جلسة المحكمة بالظبط؟

ظهرت النهاردة، علي أكونت علي تويتر، صورة بادعاء انها حكم المحكمة. الحكم، بناءً علي الصورة، ان المحكمة حكمت لصالح بهاء سلطان بالفعل، لكن العقد متفسخش ولا حاجة.

سلطان مش مضطر يعمل الألبوم التالت مع فري ميوزك. محروس ادعي في المحكمة ان الألبوم التاني، اللي لسه منزلش، فيه أربع أغاني فيهم مشاكل تقنية في التسجيل، وبالتالي المحكمة حكمت علي سلطان أنه يرجع يسجلهم تاني.

سلطان هيكون متخوف طبعاً أن محروس يماطل في التسجيل لفترة طويلة خاصة ان تسجيل الأغاني دي ممكن يستمر لسنين طويلة. وبالتالي سلطان ممكن يلجأ لنقابة الموسيقيين ويخليهم المسئولين عن اعادة التسجيل، خاصةَ أن الأغاني بالفعل متلحنة ومتوزعه ومحتاجه بس تتسجل. بالتالي لو قدر سلطان ينجز في التسجيل بسرعة هيبقي حر من العقد في أقرب وقت ممكن.

احنا مش متأكدين من صحة الصورة دي. وهل هي فعلا حكم المحكمة ولا لاء.

تحديث بتاريخ 17 سبتمبر 2020: نصر محروس في محاولات لاستفزاز بهاء سلطان

قامت الصفحة الرسمية لبهاء سلطان بنشر بوست بتقول فيه إن القائمين علي صفحة محروس علي الفيسبوك بيقوموا بالابلاغ عن كل فيديو بتنزله صفحة سلطان. حجة البلاغات دايما هي سرقة حقوق الملكية.

وده إللي خلي صفحة سلطان مهددة إنها تتقفل وأجبرها تحذف كل أغانيه، أو أي محتوي فيه صوته. دي الصفحة إللي معملوله بغرض نشر اعمال الفنان أصلا.

16 سبتمبر 2020: إلغاء عقد إحتكار بهاء سلطان مع نصر محروس

صحينا علي خبر من صفحة بهاء سلطان أن عقد الاحتكار اللي بينه وبين نصر محروس، واللي وقف شغل الفنان لفترة طويلة جداً، اتلغي بحكم محكمة.

طبعا الكلام ده معناه ان الفنان حر في انتاج اغانيه، وأننا كدا هنقدر نشوف أغاني جديدة قريب جداً.

طبعاً الخبر ده تم استقباله بفرحة كبيرة جداً من فانز الفنان الكبير. لكن للأسف في خبر مضاد طلع بوظ علينا الفرحة دي!!

صفحة نصر محروس ” صاحب شركة فري ميوزك” بتنفي صحة فسخ عقد الاحتكار

بعد اعلان الخبر بدقايق علي صفحة بهاء سلطان، قام نصر محروس بنشر بوست بيقول فيه أن الخبر ده كذب، وأن المحكمة حكمت لصالحه هو، وأن بهاء ملزم بعمل البومين واحد خلال السنة دي وواحد خلال السنة اللي جاية، وبعدها يصبح حر.

والسؤال يظل: أيه اللي حصل في جلسة المحكمة بالظبط؟

تاريخ جميل ومطرب بقدرات جبارة

سواء كنت واحد من فانز بهاء سلطان المخلصين أو لاء، متقدرش تنكر أن بهاء سلطان عنده شعبية كبيرة جداً في مصر، والفنان الجميل يستاهلها، شخصيته الجميلة ومواقفه المتواضعه بتثبت أنه شخص جميل جداً ويستاهل يتحب.

طبعاً مش ده بس اللي عمل بهاء سلطان اللي نعرفه النهاردة.

سلطان واحد من أعظم المطربين اللي ظهروا في تاريخ مصر الموسيقي

قدراته الصوتية الكبيرة كانت عنصر مهم جدا في تكوين هويته الموسيقية. صوت قوي ورخيم يقدر يتملك طبقات صوتية عميقة جداً وعالية. لكن اللي يميزة بجد أنه يقدر يوصل لطبقات سطحية ومنخفضة، وده بيديله مساحة كبيرة في الأغنية يقدر يتحرك فيها بكل حرية.

الفن مش موهبة بس، ده كمان صنعة واحتراف

كمان قدراته الفنية في مخارج الحروف والتحكم في تردد الصوت وكل التقنيات الصوتية اللي بتحتاج تدريب طويل ومش كل الناس بتقدر توصل للمثالية اللي بهاء وصلها.

احترافية الفنان بتيجي في اختياره للكلمات: ازاي يقدر يوازن بين اختيار كلمات تناسب هويته الموسيقي ومساحة صوته(الجبارة في حالة بهاء سلطان) وفي نفس الوقت يتجنب تكرار نفسه ويرضي الذوق العام للجمهور.

لو تتبعنا تاريخ بهاء سلطان الغنائي هنلاقي علامة بهاء سلطان المميزة موجودة في كل اغانية بتقول “أنا أغنية بهاء سلطان” حتي لو حد تاني غناها… التوزيع اللي بيعتمد علي علي المساحات الصوتية الواسعة والحرفية الفنية والكلمات البعيدة عن التعقيد لكن مليانة معاني.

كلمات أغانية هي حصيلة شعرية عريقة من شعراء عاميين كبار. تتميز بالانتماء الحقيقي للهوية المصرية في أصالة اللفظة والمعني والتركيب اللغوي.

الموسيقي المتنوعة في اطار علامة بهاء سلطان المميزة

علي مدار تاريخه، قدر بهاء ينوع في الحانه علشان تكون متناسقة مع الذوق الموسيقي للوقت ده، لكن في نفس الوقت كان بيفضل اللحن جواه العلامة المميزة للفنان الجميل.

عقد احتكار لمستقبل الفن

ازمة عقد الاحتكار بين بهاء سلطان ونصر محروس بدأت في 2014 بصدور البوم (سيجارة). الألبوم مخرجش للجمهور بسبب مشاكل مادية بين شركة الانتاج (فري ميوزك) وبين سلطان. نصرمحروس رفع قضية علي سلطان بيطالبة بسداد قيمة 1.5 مليون دولار، الشرط الجزائي، والقضية مخدتش حكم محكمة لحد امبارح 15 من ستمبر 2020.

في النهاية، للأسف لحد وقت كتابة المقال ده محدش عارف ايه بالظبط نتيجة الجلسة الاخيرة في المحكمة. بس أياً كانت النتيجة أحنا وراك يا فنان وبنحبك وبندعمك مهما كانت الظروف، ومستنين بفارغ الصبر نسمع اغاني جديدة منك.

فانز بهاء سلطان المخلصين هما بس اللي هيعرفوا يكملوا الكويز ده للأخر