الحكاية بدأت من ان الطالب المتحرش احمد بسام زكي كان بيبعت صور جنسية لبنتين بغرض اثبات تفوقه الجنسي ليهم و كان التواصل بغير رضاهم و دي مش اول مرة يعملها لان المحكمة كمان وقتها قالت انه ثبت قبل كده على المتهم انه هتك عرض بنات اقل من 18 سنة و ساومهم بصورهم و الفيديو اللي معاه عن طريق انستجرام لو مرجعوش يمارسوا معاه العلاقة تاني..

 و بكده مجمل الاتهامات اللي اتوجهت له كان هتك عرض 3 بنات اقل من 18 سنة و تهديد بنت بفضحها لو مسمعتش كلامه و بنت تانية كان عن طريق الكتابة بارسال كلمات خادشة للحياء و قول كلمات بها ايحاءات جنسية في مكالمات تليفون ده غير 13 اتهام بالتحرش.

و قررت النيابة حبس احمد بسام زكي على ذمة القضية لحين عرضه على المحكمة الجنائية.

 مين  ابطال الحكاية و ايه دورهم؟

خلينا قبل ما نبدأ نحط تعريف لادوار اطراف الحكم في القضية اللي هما المحكمة و النيابة العامة و محامي المتهم و محامي المجني عليه..

1- المحكمة طرف يميل الى الادلة المادية اللي بتتقدم له عشان يحكم من خلالها..

2- النيابة العامة (جهة التحقيق) اللي في القضية دي في صف البنات المجني عليهم و عايزة تجيب حقهم.

3- في الكفة التانية المتهم احمد بسام زكي و المحامي بتاعه و اللي اكيد عايز يكسب القضية.

طب لو المحكمة خدت قرار و اصدرت حكمها و فيه طرف لسه عنده ادلة جديدة ممكن تغير في الحكم سواء النيابة و محاميين البنات او محامي المتهم؟ بيبقا فيه مدة تقدم فيها ما يسمى بطعن للمحكمة و بتثبت فيه الادلة الجديدة اللي ممكن تغير الحكم و بتاخد جلسة يتم النقاش فيها.

رد المحكمة

بناء على ادعاءات النيابة و نتيجة التحقيقات, قررت المحكمة ادانته بهتك عرض 3 بنات و قضت بسجنه 8 سنين لكن برأته من 13 تهمة تحرش و ابتزاز الفتيات المذكورين بناء على القانون.

و بحسب القانون تعريف التحرش هو تعرض للغير في مكان عام أو خاص أو مطروق بإتيان أمور أو إيحاءات أو تلميحات جنسية أو إباحية سواء بالإشارة أو بالقول أو بالفعل بأي وسيلة بما في ذلك وسائل الاتصالات، بقصد حصول الجاني على منفعة ذات طبيعة جنسية، مما مفاده ولازمه إقحام الجاني نفسه وتعرضه للمجني عليه دون رضاء من الأخير. 

و ده اللي محصلش بالنسبة للمحكمة لان البنت راحتله بكامل ارادتها و ده اللي مبيعتبرش تحرش في القانون و بكده هو برئ من اتهامات تحرش.

 قالت المحكمة وقتها في حكمها بحبسه 8 سنين بسبب هتك العرض ان بناء على تحقيقات النيابة, دافع المتهم كان الانتقام من البنت اللي ارتبط بيها في اعدادي في المدرسة اللي اكتشف انها على علاقة بزميل دراسة ليهم معاهم في الجامعة.. اللي ادى ان تم هتك عرض البنت دي.

رد النيابة

المحكمة كانت في انتظار طعن النيابة على حكم تبرأة احمد بسام زكي من تهم التحرش لكن ده محصلش لحد ما الوقت المحدد لتقديم اي طعون خلص.. و بكده البراءة من تهم التحرش نهائية. 

طب ايه اللي هيحصل في احمد بسام زكي؟

رد المحكمة في حكمها بالبراءة من تهم التحرش كان هو دافع المحامي بتاع المتهم المتحرش احمد بسام زكي انه يقدم طعن قدام المحكمة و بيقول ببساطة “طالما المحكمة نفسها معترفة ان في حال رضا الطرفين الموضوع ميبقاش تحرش و على اساسه تم تبرأته من اتهامات التحرش, يبقا ازاي تم اصدار حكم بحبسه 8 سنين بسبب هتك عرض بنات كانو راضيين و هما بيعملو كده” و طالب بتبرأة المتهم احمد بسام زكي.

و طالب كمان المحكمة بوضع تعريف واضح لحالات ذهاب الأنثى للذكر في مكانه وموافقتها على الأفعال الجنسية معه ثم الشكوى من هتكه لعرضها بعد ذلك. و لسه الطعن متحددش له جلسة في المحكمة.

في النهاية بنتمني ان الطرف المظلوم يكون القانون و حكم المحكمة في صفه و يتم عقاب المجرمين في القضايا اللي زي دي.. و الجدير بالذكر ان تم وعد ضحايا جرايم التحرش و الجرايم المشابهة باعادة النظر في مواد قانون التحرش عشان المجرم ميفلتش من العقاب.

و دي اخر التعديلات اللي بيتم مناقشتها