أحمد حاتم هو ممثل مصري تخرج من كلية الاعلام و بعد التحاقه بعدة ورش تمثيلية اثبت فيها موهبته الكبيرة تم ترشيحه لاول بطولة له في فيلم “اوقات فراغ” و اللي نجح نجاح كبير جدا وقت عرضه.. و من بعدها واعماله بتثبت موهبته في ظل تنوعها ما بين اللايت و الكوميدي و الدراما في السينما و المسلسلات..

و عن اخر اعماله بطولة فيلم “عروستي“ كلمنا أحمد حاتم عن اكتر المشاهد اللي حبها و المواقف الكوميدية في كواليس التصوير و كمان كلمنا عن اعماله القادمة زي فيلم “عاشق” اللي هيبدأ تصويره مع الفنانة اسماء ابو اليزيد و فيلم “قمر 14″ اللي هيتم عرضه في مهرجان الجونة السينمائي.

و عن شغله مع هنا الزاهد كلمنا كمان عن مسلسل “انا و هي”  بعد اعمالهم الكتيرة الناجحة مع بعض و عن تجربته في مسلسل “شقة 6” قالنا رأيه في في النهاية اللي اثارت جدل كبييييير جدا..

و بخصوص شغله مع روبي طلب مننا طلب!! يا ترى ايه هو؟!

و مش بس كده لا هو كمان قال لنا خبر سعيد مفاجأة!! بخصوص ثنائيته مع الفنانة منة شلبي بعد مسلسل “ليه لا 2”

و كمان سألناه عن انجازاته الرياضية الاخيرة في رياضة السباحة خصوصا بعد دخوله موسوعة جينيس للارقام القياسية مع فريق مصر في السباحة. يعني سباح و فنان جامد!

و عن فيلم “عروستي” بيدور الفيلم في اطار لايت رومانسي مع بطلة الفيلم الفنانة “جميلة عوض” في مغامرة بيتعرضوا فيها لمواقف مختلفة بيتم طرح فيها اسئلة عن الفرق مابين الزواج عن حب و بين الزواج التقليدي (الصالونات).

و من ابرز اعمال أحمد حاتم السابقة هو فيلم “الغسالة” و “قصة حب” و “الهرم الرابع” و من مسلسلاته كمان مسلسل “حكايتي” و “لدينا اقوال اخرى” و “فوق مستوى الشبهات”.