Share
يعني ايه فيلم إينولا هولمز ؟ عارف لما تكون بتتفرج علي فيلم ومبسوط أوي! لما تلاقي نفسك متفاعل مع الاحداث بكل حواسك! تلاقيك كدا بتشارك الأبطال مشاعرهم بجد، فرحان معاهم ومتضايق وعلي اعصابك معاهم! أهو ده بقي الفيلم اللي بنتكلم عنه النهاردة. جرعة مركزة من النشاط والسعادة.
فيه كل حاجة محتاجها في فيلم جامد: غموض وألغاز محتاجة تتحل! مطاردات بوليسية وتشويق وأكشن! خناق ودراما وعياط ورومانسية منسية! نسوية وقضايا وحاجات جد وبتاع! كله عندنا. صناع الفيلم شاطرين أوي وعرفوا ازاي يجمعوا عناصر الفيلم الحلو ويظبطوها أوي. من الأخر كدا طبخوا فيلم جامد.
روايات إينولا هولمز: الوصفة الأصلية لعمل فيلم جامد
الفيلم متخذ من رواية إينولا هولمز: سر الكونت المفقود. الرواية اتكتبت 2006 بقلم نانسي سبرينجر. ولحد 2013 تم انتاج ست كتب من السلسلة.
الفيلم بيتكلم عن إينولا هولمز، 16 سنة، أخت شيرلوك هولمز، المحقق المشهور. بعد اختفاء أمها، بتطلع في مغامرة لمواجهة العالم وحل اللغز.
الجو العام للفيلم واخد ثيمة روايات شيرلوك هولمز أوي. المشاهد بتكون ماشية برتم طبيعي أوي وبعدين فجأة تخبطنا مشاهد التجلي: ودي المشاهد اللي بتتكشف فيها أجزاء من الحقيقة علشان تحل اللغز، وبيكون إيقاعها سريع وفجائي ومثير جداً، مع المزيكا العالية وطريقة الكلام السريعة والتفاصيل المكشوفة. جامد!
المزيكا موجودة في أكتر من 90% من الفيلم. حتي في الاوقات اللي أنت مش سامعها، لو ركزت كويس هتلاقي المزيكا موجودة في الخلفية، خافتة وهادية، لكن بتشارك في الجو العام للمشهد.
كسر القواعد: ازاي تعمل حاجات مبحبهاش وتخليني أحبها
اللي فاجأني شخصياً في الفيلم هو كسر الجدار التالت: لما الممثل يبص للكاميرا وليك كمتفرج، ويكلمك زي ما يكون صاحبك وشايفك وقاعد جمبك. أنا، شخصياً برضه، مش بحب كسر الجدار التالت في السينما خالص. لكن ميلي بوبي برون (اللي عملت دور إينولا في الفيلم واللي عملت دور ايليفين في مسلسل Stranger things) كانت بجد جامدة جداً وعملت الحتة دي بطريقة حلوة وضحكتني أوي وحسستني اني جزء من الفيلم، وده أضاف للفيلم العنصر الطفولي الخفيف اللي عمل كوميديا حلوة أوي.
لازم شوية دراما كدا، أومال هنعيطك ازاي؟
طبعاً الدراما مهمة جداً علشان نقدر نحقق التوازن المطلوب في فيلم غموض وتشويق. الدراما بتدي الصورة طابع انساني، وبالتالي انت كمشاهد هتقدر تتواصل مع الفيلم اكتر. يعني هتتفهم دوافع الشخصيات ومشاعرهم وهتتعاطف معاهم.
أحداث الفيلم في المملكة المتحدة في عصر الاستعمارات القارية: الوقت اللي كانت فيه بريطانيا مستعمرة مصر والصين والهند ودول تانية كتير. واللي كان عصر بداية الثورة الصناعية واستخدام المحركات البخارية. المهم ان الانجليز في الوقت ده كانوا برجوازيين أوي ومشاعرهم لازم تبان باردة طبقاً للقواعد الاجتماعية للعصر. ومحاولة اظهار الدراما وسط الطبيعة المتزمتة للشخصيات، من غير ما نبالغ ونبوظ الشخصيات ومنطقيتها، مكانش سهل خالص. لكن صناع الفيلم عرفوا يعملوه كويس وطلع في السليم.
إينولا هولمز يحتضن أحزان ودموع لندن في الخلفية
من الذكاء انك متتجاهلش الحقائق التاريخية المهمة للعصر اللي بتدور فيه أحداث الفيلم. يعني الوقت ده كان فيه مشاكل كتير: منها الفقر الشديد والجوع اللي بيعاني منه شعب لندن. التلوث والطبقية اللي بتعاني منها المدينة. الأزمات الذكورية المسيطرة علي مجتمع ذو سلطة أبوية. كل ده يمكن ميكونش مكانه في فيلم غموض وتشويق خفيف زي إينولا هولمز. لكن وجوده في الخلفية ومناقشته كجزء مهم من غير ما يبوظ الفيلم ويحرمه من عنصر الخفة واللطافة، كان عبقرية حقيقية من صناع الفيلم. برافو!
قصة حب جامد؟ أومال لاءه! أومال طبعاً
كان لازم في فيلم بالتركيبة دي يكون في قصة حب. ,علشان متبوظش اللي عملته من political correctness ونسوية وwomen empowerment كان لازم تاخد بالك من خطواتك وانتا بتبني قصة الحب دي.
صناع الفيلم بقي عملوا كدا كويس أوي، ومش بس كدا، كمان قصة الحب نفسها اتبنت حلو اوي واتوظفت حلو في تفاصيل الفيلم. مكانتش تافهة ومش منطقية ومتتصدقش. في فيلم من ساعتين تقدر تشوف قصة حب بتتبني مع الوقت، ومشاعر عمالة تتولد وتكبر من غير تسرع. ودي حاجة يمكن صناع كبار معرفوش يعملوها في مسلسلات استمرت ساعات طويلة.
المونتاج كان خفيف أوي ويضحك. قدر يوصلنا القصات والفراغات اللي بين المشاهد بطريقة لذيذة وكوميدية وشطورة أوي. وكمان عرف يضيف العنصر الـVintage اللي يرجعك لروايات شيرلوك هولمز.
فيلم جامد يبقي عايز نهاية جامدة
النهاية مش متوقعة خالص. بص! هتفاجئك… مش مفاجأة واحدة، دي طبقات وطبقات من المفاجئات والحاجات اللي مش متوقعة.
اه صح! نسيت أقولك أن هنري كيفيل (المز بتاع سوبر مان) هو اللي عامل شيرلوك هولمز. وهيلينا بونهام كارتر (الممثلة التحفة اللي بنعشقها) هي اللي عاملة أم إينولا.
المفروض أنه هتتعمل سلسلة أفلام من روايات إينولا هولمز. يعني لسه جايلنا أفلام تانية جامدة، بس قولوا يارب ميكنسلوش!
اه صح! كمان كان في خناقة علي حقوق النشر بين الشركة اللي بتنشر أعمال شيرلوك هولمز وأفلامه والشركة اللي بتنتج روايات إينولا هولمز والأفلام. الشركة الأولي بتقول أن التانية بتسرق حقوق نشر شخصية شيرلوك هولمز. يعني في قضايا ومحاكم ووجع دماغ بس اللي يهمنا ان الفيلم طلع حلو أوي وبنحبه ونزل علي نتفلكس ويلا بقي روح اتفرج عليه. مستني ايه؟
Prev Post
Contributor
Always great to read ur articles ❤