في علامات للجمال كتير جداً ومهمة وبتميزنا عن اللي حولينا.

كلنا بندور علي الجمال لأن الجمال بيخلينا مبسوطين، وكل واحد فينا عايز يكون جميل، بس ايه هو الجمال اللي بندور عليه. ويعني أيه الشخص يكون جميل؟

احنا هنا جمعنا 7 علامات للجمال واللي لو توافرت في الشخص، الشخص ده بيكون جميل.

تيجي نشوف عندك كام واحدة من أهم 7 علامات للجمال؟

1 – تقبل الذات وحبها

بداية الجمال بيكون حب الذات وتقبلها زي ماهي. الموضوع مش سهل، احنا محاطين بافكار وإعلانات سطحية عن الجمال، بتصدرلنا شكل واحد نمطي عن الجسم المثالي والملامح والألوان، لدرجة بتخلينا نكره نفسنا لأننا مش شبه الصورة النمطية اللي بنشوفها في وسائل التواصل الاجتماعي أو السينما طول الوقت.

والحقيقة ان الجمال مفهوم مجرد والمفاهيم المجتمعية السائدة هي اللي بتقرره، أو زي في حالة عصر العولمة، اللي إحنا عايشينه، بيتحدد بالمفاهيم السائدة للثقافة المسيطرة، اللي هي الثقافة الغربية اللي بتصدرلنا الجسم المثالي علي انه مقاس 0 وملامح متناسقة بشكل مبالغ فيه.

الحقيقة أن المعايير الجمالية دي كلها كذب واللي قررها مجموعة أشخاص بيعبروا عن نظرتهم الشخصية للجمال.

أنتي مش محتاجة تغيري حاجة في نفسك علشان تكوني جميلة. أنتي جميلة بذاتك، الوصول لتقبل الذات وحبها مش مجرد كلمتين هتقريهم هنا ولا في أي مكان. الموضوع هيحتاج منك وقت ومجهود وممكن كمان مساعدة طبيب نفسي متخصص. بس لازم تبدأي المشوار.

2 – النفسية المرتاحة من أهم 7 علامات للجمال

الاتزان النفسي مهم جداً علشان يبرز جمالك اللي جوا واللي برا. عمرك شفتي حد مش متزن نفسياً بيكون جميل؟ حتي لو كان جميل من برة، بنحس إنه بيفقد جزء من جماله الداخلي.

لازم تحافظي علي صحتك النفسية وتشتغلي عليها. ادي نفسك وقت تتحري فيه من كل الضغوط النفسية ولو كان عندك أي عائق بيخليكي مش سعيدة أو بيخليكي مضطربة نفسياً، روحي لدكتور نفسي يساعدك تستعيدي صحتك النفسية، ده مش عيب خالص.

3 – العلاقات الصحية

علشان تحققي الاتزان النفسي السليم وتقدري تتقبلي ذاتك وتحبيها لازم تكوني محاطة بعلاقات صحية. العلاقات السامة أو غير الصحية بتدمر اتزاننا النفسي وبتخلي جمالنا يدبل ويروح. ولما تستهلكي طاقتك كلها في محاولة المحافظة علي علاقة سامة، ده هيأثر كمان علي شكلك الخارجي، بشرتك وجسمك هيظهر عليهم أعراض وحشة هتخليكي متضايقة وحاسة أنك مش جميلة طول الوقت، وبالتالي مش هتحبي نفسك.

4 – الجسم الصحي من أهم 7 علامات للجمال

الجسم الصحي معناه ان صحتك كويسة وانك مش هتتعرضي لأمراض ومشاكل. وعلشان تحققي جسم صحي لازم تخلي بالك من أكلك. بلاش الوجبات السريعة تماماً، أو حاولي تقللي منها على قد ما تقدري وحاولي تاكلي أكل صحي طول الوقت. مش مشكلة لما ناكل برجر وبيتزا من وقت للتاني وننبسط. بس بلاش يبقي ده نمط حياتنا.

ننزل الجيم بقي! انزلي اعملي تمارين. مش علشان تخسي والناس تشوفك جميلة. جسمك حلو زي ما هو أياً كان مقاسك. انزلي الجيم علشان التمارين هتحرك عضلاتك وهتخلي الدورة الدموية عندك صحية، وصحتك هتبقي أحسن بكتير. انزلي الجيم علشان توصلي للجسم اللي أنتي عايزاه. أياً كان، أهم حاجة تكوني راضية عن نفسك ومتأكدة إنك جميلة في كل الأحوال. ومثال على كلامنا ليزو المغنية الأمريكية اللي بتحب نفسها كدة زي ما هي ومعندهاش أي مشكلة في شكل جسمها.

5 – إلبسي الستايل اللي يريحك ومناسب لجسمك وملامحك

شوفي بتحبي تلبسي ايه والبسيه. وممكن تاخدي نصايح Styling تتطبقيها علي اللبس اللي انتِ بتحبيه، والنصايح دي ممكن تقولك تلبسي ايه يناسب نوع جسمك.

وعندك بيلي ايليش، بتلبس اللي بتحبه وليها الستايل بتاعها بغض النظر عن رأي الناس في أزيائها، وكلنا بنحبها!

6 – العناية بالبشرة والأسنان

بشرتك هي سر جمالك. أعملي روتين يومي للعناية بالبشرة. أعرفي نوع بشرتك الأول إذا كانت دهنية ولا جافة ولا مختلطة، وشوفي إيه المنتجات الأحسن علشان تحافظي بيها علي شبابها ورونقها.

وكمان لازم تحافظي علي صحة أسنانك. الابتسامة الحلوة هي مفتاح الجمال. اغسلي أسنانك مرتين في اليوم علي الأقل، مرة الصبح ومرة بالليل. ومش أكتر من تلات مرات. واستخدمي خيط أسنان علشان تنضفيها من الأكل اللي بيتراكم ما بينهم، وده مهم جداً لأن معظم حالات التسوس بتبدأ ما بين الأسنان.

زوري طبيب جلدية علشان يتابع معاكي ايه أحسن طرق تتعاملي بيها مع بشرتك ويعرف لو عندك حساسية في الجلد من حاجة معينة. ولازم تشوفي دكتور الأسنان مرة كل شهر علشان يطمنك علي صحة أسنانك.

7 – الثقة بالنفس

برضه دي مش حاجة سهلة وسط الأفكار المسمومة اللي بتوصلنا من كل حتة واللي بتحددلنا شكل الجمال في معايير محددة وصلبة. بس لو اشتغلتي علي النقط اللي اتكلمنا عليها فوق هتقدري توصلي للنقطة دي. وكمان لازم تقرري من جواكي وتقولي لنفسك إنك جميلة زي ما أنتِ. وأول ما تفهمي كدا بجد، الثقة في النفس هتيجي لوحدها. ومع الثقة دي دايماً بتيجي كاريزما بتكون عاملة زي السحر.

للأسف المجتمع المعاصر مليان مفاهيم قبيحة جداً عن الجمال، لدرجة أننا نسينا أن الجمال شئ نسبي بيعتمد علي عين الناظر. وكل واحد فينا عنده معايير معينة بيحبها وبيشوف إنها سبب للجمال. فأحنا لازم نحب نفسنا ونتقبلها زي ما هي. 

حد فاكر استديوهات تصوير زمان؟ طيب تعالوا معانا في جولة مع أجمد حركات التصوير بتاعت زمان