لقينا ڤيديو فيه الفنانة نادية الجندي لابسة نڤرتيتي وبتغني وكان لازم نعرف ايه ده، دورنا وعرفنا ان أول ديسمبر ٢٠٢٠ بدأت قناة MBC Masr تنزل اعلانات لبرنامج جديد هتبدأ عرضه، أسمه The Masked Singer: أنت مين؟ برعاية OPPO

الإعلان كان فيه فنانين زي حسن الرداد وسيرين عبد النور وقصي الخولي وكمان الممثل ومقدم البرامج السعودي مهند الحمدي بيحاولوا يكتشوفوا حقيقة شخصيات لابسة ماسكات وملابس تنكرية زي أسد، كوبرا، غوريلا وحاجات تانية كتير.

اتكلمنا مع حد من مديرين الانتاج The Masked Singer: أنت مين؟ عشان نفهم فيه ايه، بس الأول الفكرة دي جت منين؟

THE MASKED SINGER: Host Nick Cannon and Night Angel in the all-new “The Mother Of All Final Face Offs, Part 1” episode of THE MASKED SINGER airing Wednesday, April 8 (8:00-9:01 PM ET/PT) on FOX. CR: Michael Becker / FOX. © 2020 FOX Media LLC.

– البرنامج The Masked Singer بدأ من كوريا الجنوبية سنة ٢٠١٥ كبرنامج مسابقات غنائي من انتاج شركة MBC بردو ومكمل لحد دلوقتي ووصل للحلقة رقم ٢٨٨ على مدار ال ٥ سنين اللي فاتوا.

– البرنامج اتشهر ونجح جدًا وبدأ يتعمل في ڤييتنام والصين ولحد ما وصل أمريكا وبيقدمه Nick Cannon.

– قررت شركة MBC انها تعمله في الوطن العربي كمان وبدؤوا التصوير في استديوهات MBC في لبنان لمدة شهر.

– بدأ عرضه يوم ٩ ديسمبر وبييجي كل يوم أربع.

طيب ايه اللي بيحصل؟

– البرنامج بيكون فيه ١٢ شخصية مشهورة “ممثلين، مغنيين، مذيعيين، لعيبة كورة” من الوطن العربي كله بيغنوا من ورا ملابس تنكرية بس محدش بيكون عارفهم في الأول! البرنامج فكرته قايمة انك تخمن مع لجنة المحققين مين الشخص الحقيقي اللي بيغني ورا الماسك من شوية hints ممكن تديك دليل عن حقيقة الشخص بس ده بعد ما كل المتسابقين يغنوا في كل حلقة والجمهور اللي في الاستديو بيبدأ يعمل تصويت وأقل واحد بياخد تصويت هو اللي بيتكشف عن شخصيته وبيخرج من البرنامج.

ايه الجديد؟

– الخروج عن فكرة برامج المواهب العادية لأن المتسابقين نجوم وموهوبين من البداية.

– المرة دي اسمهم “لجنة تحقيق” مش “لجنة تحكيم” عشان الهدف من البرنامج هو المتعة مش اختيار حد معين.

– مفاجأة الشخصية الحقيقية اللي ورا الماسك!

سبع حاجات تعرفهم عشان سرية برنامج The Masked Singer:

١- ال ١٢ متسابق ميعرفوش بعض ومحدش يعرف مين موجود!

٢- مش كل المتسابقين بيقعدوا في فندق واحد.

٣- فيه تعليمات مشددة ان مفيش اي أخبار تخرج ان الفنانين دول موحودين في لبنان اصلًا!

٤- المتسابقين بيروحوا الاستديو لابسين هدوم سودا مكتوب عليها “لا تكلمني”  وgloves و full black face shield عشان محدش يعرفه.

٥- كل المتسابقين بيدخلوا من باب مختلف للاستديو غير باب الجمهور وباب اي staff تاني.

٦- المتسابقين يقدروا يختاروا الملابس التنكرية اللي هيلبسوها!

٧- كل الأغاني اللي بتتغنى في البرنامج بتبقى playback وكل المتسابقين سجلوا الأغاني دي قبل ما البرنامج يكون live.

لحد دلوقتي خرج فنانين زي ظافر العابدين في شخصية الأسد، نادية الجندي في شخصية نڤرتيتي، المذيع نيشان في شخصية الصقر وكهربا في شخصية الغوريلا وفنانيين غيرهم كتير.

البرنامج لسة فاضل فيه ٥ حلقات فيهم شخصيات لسة منعرفش هم مين زي الكوبرا وشهرزاد والذئب والطاووس والفهد.

مدير الانتاج كمان قالنا مين اللي هيكسب في آخر حلقة ودي أكبر مفاجأة في البرنامج ف اتفرجوا على البرنامج كل يوم أربع وحاولوا تخمنوا مين هيكسب!