الحمل هو أجمل وأسمى تجربة في الحياة الست ممكن تعيشها. وزي ما التجربة دي ليها جمالها ولحظاتها السعيدة فهي كمان ليها شوية تحديات.

أكبر تحدي بيقابل الست هو إن شكل جسمها بيتغير وبتزيد في الوزن. وده طبعاً بيصعّب عليها مهمة إنها تشتري لبس مناسب لشكلها الجديد، لأنها مش بتبقى متعودة على شكل جسمها اللي بيتغير شهر بعد شهر وعلى إيه اللي يليق عليه. فبتحس دائماً إنه من الصعب أو يمكن مستحيل إنها تكون أنيقة وفي نفس الوقت حاسة بالدفء في الجو البرد ده. وبجد بتحس إنها معادلة صعب جداً تحقيقها.

بس مين قال إنك علشان حامل ده معناه إنك ملقيش الحق في إنك تلبسي لبس حمل شيك وأنيق. كتير من الأمهات ومدونات الموضة عرفوا يثبتوا إن أزياء الحمل والموضة ممكن يتحققوا في معادلة واحدة ومش حاجة مستحيلة ولا حاجة.

بالعكس ده كمان في أفكار كتير ممكن تختاري منها اللي يعجبك وتلبسي Look جديد يبرز جمال الفترة دي من حياتك. علشان كدة جمعنالك هنا شوية أفكار بالصور علشان نسهل عليكي المهمة دي.

الفستان الشتوي + الكارديغان

لأنك في الحمل بتبقي تعبانة ومش قادرة تفكري انت هتلبسي إيه النهاردة، الستايل ده من الـLooks السهلة جداً إنك تنسقيها. دوري على ستايل الفستان اللي تحسي إنه مناسب أكتر لشكل جسمك. وممكن تختاري ما بين تصاميم الفساتين الضيقة أو الواسعة. ولو ضيقة يُفضل إنه يكون في الفستان فتحة جانبية بسيطة عشان يسهل عليك الحركة. وعلشان تحسي بالدفء أكتر أو لو قلقانة إن الفستان يكون مخلي شكل جسمك زايد في الوزن، البسي فوقه الكارديغان الصوف أو بلطو هيخلي شكل جسمك أحلى بكتير وهيديكي Style أنيق جداً.

الشال بطريقة جديدة

 أوقات كتير بيبقى عندك Top كنت بتحبي تلبسيه أو سويتر مُفضل كان عندك قبل فترة الحمل ونفسك ترجعي تستخدميهم بس طبعاً الشكل مش هيبقى حلو قوي لأن الـStyle هيبقى ضيق جداً. وعلشان نحل المشكلة دي ممكن تلبسي فوقه شال طويل وتقفليه بحزام شيك هيغير شكله تماماً.

السويتر الواسع

لو كنت من الناس اللي بتحب تخبي بطن الحمل فالسويتر الواسع هيكون اختيار حلو جداً ليكي ده غير إنه مريح وشيك في نفس الوقت.

الجاكت الرسمي

لو بتشتغلي وعايزة Look رسمي شوية ممكن تلبسي بنطلون الحمل المناسب وهتزودي الجاكت الرسمي فوق الـPullover. وهيبقى أحلى كتير لو اختارتِ جاكت بلون مبهج لأن ده أكيد هيزود من جمالك وجمال طلتك.