تحذير: المقال ده ممكن يسبب صدمة نفسية أو حالة من الرعب للقراء ضعيفي القلب.

كلنا في النهاية هنموت، والمحظوظين مننا بيموتوا عواجيز علي سريرهم ووسط الناس اللي بيحبوهم، لكن اللي حظهم أقل بيجربوا أفظع الطرق للموت.

الموت عامل زي فنان سادي، عنده طرق كتير علشان ياخد ضحاياه، وعلشان البشر كائنات ذكية، هما نفسهم ساعدوا الموت يكتشف طرق أكثر فنية وترويعاً، سواء من خلال التعذيب أو تحضير الضحايا للموت بأكتر الطرق المرعبة والشنيعة.

في المقال ده عملنا شوية أبحاث علشان نفهم أسوء الطرق للموت علي حسب كلام العلماء.

1 – الموت محروق من أسوء الطرق للموت

الموت محروق مؤلم جداً طبعاً، بس غالباً النار بتاكل الضحية بسرعة جداً وبتوصل لأعضاء مهمة وبتسبب وقوفها في وقت قياسي، غير أن الإختناق من الدخان غالباً بيكون هو سبب الموت.

كمان النار بتحرق النهايات العصبية للضحية بسرعة وبالتالي وقت الألم بيكون أقل.

إنما الموت بنار ضعيفة وهادية وبشكل منظم بيكون شنيع. لما تكون النار مش بالقوة الكافية علشان تحرق بسرعة، مبتقدرش توصل للنهايات العصبية والأعضاء المهمة بسرعة وبالتالي الألم بيستمر فترات طويلة جداً. وده اللي بيحصل في حوادث العربيات لما بتتحرق.

ودي الطريقة اللي كان صائدي الساحرات في الولايات المتحدة بيقتلوا الساحرات بيها.

2 – الموت بالتسمم الإشعاعي من أسوء الطرق للموت

التسمم الإشعاعي بيحصل لما جسم اللإنسان بيتعرض لإشعاع أعلي من 200 rem وفي الحالات دي الإشعاع بيدخل الجسم وبيدمر الخلايا والحمض النووي واللي بدوره بيسبب طفرات جينية خطيرة بتسبب تشكل أورام سرطانية متعددة.

في سنة 1999 كان في واحد ياباني أسمه هيساشي أوشي اتعرض لجرعات عالية جداً من الإشعاع في المحطة النووية اللي بيشتغل فيها.

هيساشي اتعرض لكمية خطيرة من الإشعاع خلت الحمض النووي بتاعه اتدمر بالكامل، وبقي أول إنسان يعيش من غير حمض نووي في جسمه خالص.

مع الوقت بدأ جسمه يتحلل ولأن معندوش حمض نووي، جسمه بطل يعمل خلايا دم وبالتالي كان عايش علي نقل الدم كل يوم، الألم اللي عاشه أوشي خلاه اترجي الدكاترة يسيبوه يموت لكن للأسف الدكاترة لقوها فرصة لدراسة تأثير الإشعاع علي الجسم البشري.

اللحم بدأ يدوب من علي جسمه واضطروا يلفوه في شاش علشان يمنعوا جلده من النزيف ولحمه من انه يوقع. للأسف رجله حرفياً وقعت من مكانها وفي أخر أيامه اتحول لجمجمة حية لحد ما مات بعد 81 يوم بسكتة قلبية.

3 – الموت ضحية كائن مفترس

معظم المفترسات عندها غريزة طبيعية تخليها تهاجم الضحية بأكثر طريقة فعالة للموت. المفترس بيهاجم في الغالب الرقبة علشان يقطع الشرايين اللي بتغذي المخ بالدم وكمان يقطع أجهزة التنفس. الموتة دي مؤلمة طبعاً بس إلي حدِ ما بتكون سريعة. وده مش لأن المفترس عنده رحمة ناحية الضحية ولكن لأنه عايز الضحية عاجزة عن الحركة وهو بياكلها علشان متسببلوش أي جروح.

في الناحية التانية في مفترسات مبتهتمش أوي بسلامتها الشخصية زي الضباع: الضباع بتهاجم الضحية وتبدأ تاكلها علي طول وغالباً بتبدأ بأكتر مكان طري، زي البطن، ولأن الضباع غالباً بتصطاد في جماعات الضحية بتلاقي نفسها محاطة بشلة ضباع بيقطعوا لحمها وبتفضل تتفرج علي نفسها وهي بتتاكل لحد ما تموت من النزيف.

اللي أسوء من مجموعة ضباع تاكل الضحية هو أن الضحية تتاكل من ضبع واحد، لأن معني كدا أن الوقت اللي الضبع هياخده وهو بياكل هيكون أطول وبالتالي الألم اللي هتحس بيه الضحية هيستمر فترة أطول بكتير.

4 – الموت من نقص الميا Dehydration

الميا بتشكل 60% من جسمنا وبالتالي نقص الميا بيسبب فشل معظم العمليات الحيوية.

لما الجسم بيخسر أكتر من 30% من محتواه من الميا بيحذرنا في شكل الإحساس بالعطش. والنسبة دي بنخسرها في أي مجهود عادي زي التمارين.

لكن لو النسبة دي زادت بيبدأ الجسم يشغل حالة الطوارئ وفيها بيقلل نسبة التعرق علشان ميخسرش ميا تاني. وده بيزود حرارة الجسم وبيحبس السموم جوا.

كمان بيقلل نسبة الميا اللي بتدخل المثانة وبالتالي البول بيبقي لونه أغمق وريحته أقوي.

الألم من نقص الميا بيكون متمثل في حالة من التشوش العقلي لأني خلايا الجسم ومنها المخ بتنكمش من نقص الميا والإنكماش ده بيسبب نبضات مستمرة من الألم.

الموت من نقص الميا بياخد أيام  لو مكانش أسابيع.

5 – الموت من الجوع من أسوء الطرق للموت

الجوع بيسبب فقدان الجسم لمصدر السعرات الحرارية ومع الوقت بيخلي العضلات ضعيفة جداً وبيسبب ألم شديد في المفاصل. كمان غياب الأملاح المعدنية والفيتامينات بيسبب فشل في الأعضاء وده بيسبب ألام شديدة في التنفس وفي البطن وبيخلي الجهاز المناعي ينهار.

الألم ده بيستمر فترات طويلة لأن الموت من الجوع بياخد أحياناً أيام طويلة لو مكانش أسابيع.

 6 – الموت بقطع الراس

الموت بقطع الراس ممكن يبان مش مؤلم وسريع، لكن العلماء بيقولوا أن الضحية بيفضل واعي لثواني معدودة بعد ما راسه تتقطع والألم بيكون من إدراك أن راسه اتقطعت والإحساس بالأعصاب اللي أنفصلت عن مكانها.

رغم أن الألم بيكو لثواني قليلة بس إلا أنه بيكون شنيع.

7 – الموت بالصلب

الصلب هو تعليق الشخص علي صليب بدق مسامير في ايديه ورجليه.

والطريقة دي للموت شنيعة جداً لأنها بتشتمل علي ألام الجوع والعطش والتعرض المفرط للشمس.

الموت بياخد أيام علشان ياخد الضحية وخلال الأيام دي الألم بيكون شنيع ومستمر.

8 – الإعدام علي الكرسي الكهربائي

علي الكرسي الكهربائي بيتحط للمحكوم عليه بالإعدام سفنجة مبلولة علي دماغة وبتتوصل خوذة حديد علشان الكهربا توصل دماغه علي طول ويموت بسرعة.

لكن الحقيقة أن المحكوم عليه بيحس بألم في كل أنحاء جسمه. ألم شديد جداً وسريع وبيبدأ جلده وأعضاءه الداخلية تتحرق وتدخن وده بيوصله لنسبة عالية جداً من الألم. أحيانا الإحتراق بيتحول لشعلات من النار بتملي جسم المحكوم عليه بالكامل.

في أسوء الحالات العملية بتحتاج 10 دقايق كاملين علشان تقدر تقتل المحكوم عليه.

9 – الإعدام بحقنة السم

لو كنت فاكر الإعدام بحقنة السم سهل ورحيم فأنت غلطان. رغم أن المحكوم عليه بيتحقن بمخدر اسمه ثيوبنتالات الصوديوم إلا أن الكمية اللي بيتحقن بيها يدوب تكفي لتخدير حيوان صغير زي الأرنب. وبالتالي هي بتوصل المحكوم عليه لحالة من الهدوء بس وجرعات السم اللي بيتحقن بيها بتسبب ذوبان للأعضاء الداخليه وده اللي بيحس بيه الضحية بالكامل.

تخيل أن أعضاءك الداخلية عمالة تدوب وتتشوي!

10 – الموت غرقان

الموت غرقان بيكون بطئ جداً. امتلاء الرئتين بالميا لوحدة مؤلم جداً.  كمان الصدمة النفسية اللي بتفضل وقت كافي والشعور بالموت جاي بيكون تجربة شنيعة جداً.