جفاف البشرة مشكلة بتعاني منها سيدات وبنات كتير خاصة في فصل الشتاء، وأكتر منطقة بتتأثر هي بشرة الإيد وده نتيجة للاستخدام المستمر للماية والكحول وعمل شغل البيت اللي مش بيخلص. والحاجات دي ممكن تزود من المشكلة بشكل كبير.

الجفاف والتشققات من الحاجات المزعجة جداً وفي بعض الأحيان بيبقى إحساس مؤلم وغير مريح. وطبعاً مش كلنا خبراء في العناية بمشاكل البشرة والاهتمام بيها، عشان كدة فكرنا نساعدك ونقدملك طرق بسيطة وسهلة ممكن تبدأي بيها لو ملكيش قوي في روتين العناية بالبشرة ومش عارفة تبدأي منين.

فلو كنت متضايقة من شكل إيدك وملمسها تابعي النصايح اللي هنقولهالك في المقال ده عشان تستعيدي جمالها ونعومتها

استخدام الماء الساخن

أكيد الجو البرد ده بيخلينا نستخدم الماية السخنة عشان نحس بالدفا، لكن لازم تحاولي على قد ما تقدري إنك تبعدي عن استخدام الماية السخنة وتستخدمي الدافية. وده لأن الماية السخنة مُضرة جداً للبشرة وبتخليها تفقد الزيوت الطبيعية اللي موجودة فيها واللي بتخليها مُرطبة بشكل طبيعي وبتسرع من عملية جفاف البشرة.

مقشر البشرة

زي ما بنهتم إننا نعمل ماسكات تقشير لبشرة الوش والجسم، الإيدين كمان لازم نعاملها نفس المعاملة، بل بالعكس دي يمكن محتاجة اهتمام أكتر من أي منطقة تانية في الجسم لأنها بتتعرض باستمرار للماية والصابون والكحول. ممكن تستخدمي مُقشر لطيف علي البشرة زي زيت جوز الهند والسكر. الخليط ده هيساعدك إنك تتخلصي من خلايا البشرة الميتة وهيرطبها بشكل ملحوظ. بس ياريت بلاش تستخدمي المُقشر على بشرة فيها جروح بسبب الجفاف ممكن تعالجيها الأول وبعدين تستخدمي المُقشر.

الترطيب ثم الترطيب

لازم تستخدمي مُرطب بعد المُقشر أو بعد غسل الإيدين بصفة عامة. ويُفضل تكون تركيبة المرطب زيتية مش مائية عشان الزيوت هتخلق طبقة حماية على البشرة وتخليها تحتفظ بالترطيب لمدة أطول. حاولي يكون معاكي كريم للإيد في شنطة إيدك طول الوقت. كل ما تحسي إن بشرتك جافة تستخدميه.

الجوانتي هو صديقك الجديد

حاولي دايماً وأبداً تلبسي جوانتي وانتي في المطبخ ويُفضل طول الوقت مش بس في الشتا. وبرضو لما تخرجي ممكن تلبسي جوانتي شيك عشان تحمي إيدك من الجو البارد واللي ممكن يكون سبب في إن إيدك تبقى جافة.

زيت الزيتون

زيت الزيتون من الزيوت الغنية جداً بفيتامين E ومليان بمضادات الأكسدة اللي بتحمي البشرة من أي أضرار. من وقت للتاني ممكن تدهني إيدك بشوية زيت زيتون والبسي جوانتي بلاستيك عشان تضمني إن بشرتك امتصته وبعدين امسحي إيدك بقطعة قماش عشان تتخلصي من أي زوائد. هتحسي بعدها على طول بالفرق وهتشوفي نضارة ونعومة في إيدك.

ولو عايزة ترشيحات لمستحضرات تجميل البشرة والعناية بيها شوفي المجموعة اللي جاية وممكن تشتريهم على طول:

BODY BLOOM Vanilla, Hand & Body Scrub

NOON Hand Treatment Oil

JOVIALITY Strong n’ Long Nail Oil

JOVIALITY Strong n’ Long Nail Oil