جرائم القتل البشعة و الغريبة في الفترة الاخيرة بقينا بنسمع عنها كتير جدا و اخرهم كان النهاردة عن المتهم صلاح المرسي ابو العباس اللي قتل مراته و بناته الاتنين بطريقة عنيفة جدا.

النهاردة محكمة النقض ايدت حكم محكمة جنايات القاهرة باعدام المتهم صلاح الفنان المرسي ابو العباس لقتل زوجته و بناته الاتنين مع سبق الاصرار و الترصد.

ايه الحكاية من اولها؟ جبنالكم التفاصيل

حكاية قضية صلاح المرسي ابو العباس (مذبحة بولاق) من الاول لحد النهاردة

الحكاية بدأت في شهر يونيو سنة 2018 لما تم اتهام المتهم صلاح المرسي ابو العباس بقتل زوجته و بناته الاتنين حبيبة و جنة. و من تفاصيل القضية ان المتهم قتل زوجته في اوضة نومهم مخنوقة و كذلك بناته الاتنين في اوضتهم بنفس الطريقة و محدش عرف يهرب.

المتهم بعدها ابلغ قسم بولاق الدكرور بإنه كان برا البيت بيتفرج على ماتش مصر و روسيا و بعد الماتش و كان بيتصل بزوجته مش بترد. كمل و قال انه لما رجع البيت اتفاجئ بوجود ال 3 جثث بتوع زوجته و بناته حبيبة و جنة و كمان قال ان كان فيه حاجات مفقودة من البيت منهم مبلغ 340,000 جنية و قال في التحقيقات ان المبلغ ده تمن شقة ورثها عن والده الفنان المرسي ابو العباس و باعها قبل الحادثة ب 10 ايام.

و لكن مع الوقت في التحقيقات اعترف المتهم أنه كان ناوي ينتحر بعد ما ارتكب الجريمة دي و لكن رجع في كلامه يوم الجريمة بعد ما اتفرج على ماتش مصر و روسيا. قال كمان انه خسر فلوسه كلها في البورصة لانه كان مدمن مضاربة و خاف على اسرته من الفقر.

كنت خايف ميعرفوش يأكلوا ويشربوا

و التحقيقات كمان اوضحت باعترافات المتهم نفسه انه قتل زوجته بعد ما ضربها و قتل بناته بعد كده نام ساعة و نزل يشرب حاجة و يتفرج على الماتش بعد كده بلغ عن الحادثة. اعترافات المتهم كانت من الواضح انها بعكس اللي قاله وقت تقديمه البلاغ.

و لكن بعد ما المتهم قال انه بيعاني من مرض نفسي و بيتعالج منه بقاله 6 سنين طلبت النيابة عرضه على مستشفى الامراض النفسية و العقلية للتأكد من كلامه. و في الوقت ده التحريات اثبتت انه كان بيعامل مراته وحش و كان في فترة ناوي يتجوز عليها.

و لكن بعد ما تم اخذ عينات من ايد الزوج و عرضها على الطب الشرعي اتأكدوا انه هو اللي ارتكب الجريمة.

بعدها اتحول المتهم لمحكمة جنايات القاهرة في 3 ابريل 2019 و اللي حكمت عليه بالاعدام.

القضية بعدها راحت للدائرة الجنائية في محكمة النقض بعضوية المستشارين على حسنين، عادل عمارة، أحمد أمين، وهشام الجندي ود. أكرم بكري، وتامر الجمال، وحسن عبد الحميد، وحسام حسين الجيزاوي، ومحمد كامل باشا.

و النهاردة 26 مارس 2022 اصدرت محكمة النقض قرارها بتأييد حكم الاعدام على صلاح المرسي ابو العباس اللي قضت بيه محكمة جنايات القاهرة في ابريل 2019.

في النهاية ربنا بتولى المفقودين برحمته الواسعة و بحكم النهاردة يكون حقهم رجع لهم بالقانون.